ރައީސް އިބްރާހީމް މުހައްމަދު ސޯލިހްގެ ވެރިކަމުގައި އުފެއްދި ސެޓުލްމެންޓް ކޮމިޓީން އެކި ފަރާތްތަކަށް ބަދަލު ދީފައިވާ ގޮތް ބަލައި އެކަމުގައި އެއްވެސް މައްސަލައެއް އުޅޭނަމަ އެކަން ތަހުގީގުކޮށް ދައުވާކޮށްދިނުމަށް ފްރޮސެކިއުޓާ ޖެނެރަލްއަށް އެންގުމަށް ރައްޔިތުންގެ މަޖިލީހުން މިއަދު ފާސްކޮށްފި އެވެ.
ރައްޔިތުންގެ މަޖިލީހުގެ މާލިއްޔަތު ކޮމިޓީއަށް ހުށަހަޅައި ކޮމިޓީން ފާސްކޮށްފައިވާ ގޮތަށް މަޖިލީހުގެ ތަޅުމުން ކޮމިޓީގެ ރިޕޯޓް މިއަދު ފާސްކުރީ 55 މެންބަރުންގެ ތާއީދު ވޯޓާ އެކު އެވެ. ކޮމިޓީ ރިޕޯޓް ފާސްކުރުމާ ދެކޮޅަށް 11 މެންބަރުން ވޯޓު ދެއްވި އެވެ.
މާލިއްޔަތު ކޮމިޓީއަށް މި ހުށަހެޅުން ހުށަހެޅުއްވީ ވެރިކަން ޕީއެންސީގެ ފުނަދޫ ދާއިރާގެ މެންބަރު މުހައްމަދު މަމްދޫހު އެވެ. މިހުށަހެޅުމަށް ޕީއެންސީގެ ކެލާ ދާއިރާގެ މެންބަރު އަބްދުﷲ ޝަރީފް ތާއީދު ކުރެއްވުމާ ގުޅިގެން ކޮމިޓީގައި އިއްޔެ މި ހުށަހެޅުން ފާސްވީ ހަ މެންބަރުންގެ ތާއީދާ އެކު އެވެ.
މާލިއްޔަތު ކޮމިޓީގައި މަމްދޫހު ވިދާޅުވީ ސެލްޓްމަންޓް ކޮމިޓީ މެދުވެރިކޮށް ބަދަލުގެ ގޮތުގައި އެކި ފަރާތްތަކަށް 36 ރަށާއި ހަ ފަޅާއި އަދި ދެ ބިލިއަން ރުފިޔާ އަށް ވުރެ ބޮޑު އަދަދެއްގެ ފައިސާ ރައީސް ސޯލިހްގެ ވެރިކަމުގައި ދޫކޮށްފައިވާ ކަމަށެވެ.
ކޮމިޓީގައި ވާހަކަދައްކަވަމުން ހިތަދޫ މެދު ދާއިރާގެ މެންބަރު އަހްމަދު އަޒާން ވިދާޅުވީ ކުރީގެ އިކޮނޮމިކް މިނިސްޓަރު އަދި އެމްޑީޕީގެ ޗެއާޕާސަން ފައްޔާޒު އިސްމާއީލް ސެޓްލްމަންޓް ކޮމިޓީގައި އިންނަވައިގެން އާއިލީ ބަޔަކަށް ރިސޯޓް ހަދަން ރަށްތަކެއް ދީފައިވާ ކަމަށެވެ.
"މިއީ ރާއްޖޭގައި ކުރިން އަމަލުކުރަމުން އައި ގޮތެއް ނޫން. މީގެކުރީގައި ބަދަލު ދީފައިވަނީ ކޯޓު މަރުހަލާއިން ގޮތްތަކެއް ނިންމުމުން،" އަޒާން ވިދާޅުވި އެވެ.
ރައީސް ސޯލިހްގެ އިތުރުން އޭރުގެ އިކޮނޮމިކް މިނިސްޓަރު އަދި އެމްޑީޕީގެ ޗެއާޕާސަން ފައްޔާޒު އިސްމާއިލާއި ރައީސް އޮފީހުގެ އޭރުގެ މިނިސްޓަރު އަލީ ޝިޔާމްގެ މައްޗަށްވެސް ޖިނާއީ ތަހުގީގެއް ހިންގައި، ދައުވާ ކޮށްދިނުމަށް ޕީޖީގައި އެދެން ކޮމިޓީ ރިޕޯޓްގައި އޮތީ ހިމަނާފަ އެވެ.
މާލިއްޔަތު ކޮމިޓީގެ ރިޕޯޓްގައި ވަނީ 2019 އިން 2023 ވަނަ އަހަރާ ހަމައަށް ސޮއިކޮށްފައިވާ ސެޓްލްމަންޓް އެއްބަސްވުންތަކަކީ އުފެދުމުގައިވެސް ބާތިލް އެއްބަސްވުންތަކެއް ކަމަށްވެސް ކަނޑައަޅާފަ އެވެ.
ރައީސް ޑރ. މުހައްމަދު މުއިއްޒު ވެރިކަމަށް ވަޑައިގަތުމަށްފަހު ވަނީ ރައީސް ސޯލިހް އުފައްދަވާފައި އޮތް ސެޓްލްމަންޓް ކޮމިޓީ އުވާލައްވާފަ އެވެ.