ވަޒީރުންނަށް ރުހުން ދިނުމުގެ މައްސަލަ ކޮމިޓީއަށް

ރައިސުލްޖުމްހޫރިއްޔާ އިބްރާހިމް މުހައްމަދު ސޯލިހު އައްޔަން ކުރައްވާފައިވާ ވަޒީރުންނަށް ރުހުން ދިނުމާ ބެހޭ މައްސަލަ ދިރާސާ ކުރުމަށް ރައްޔިތުން މަޖިލީހުގެ ކޮމިޓީއަށް ފޮނުވައިފި އެވެ.

ރައީސް ސޯލިހު ފޮނުއްވި ސިޓީފުޅު އިއްވަމުން މަޖިލީހުގެ އަމީންއާމް ފާތިމަތު ނިއުޝާ ވިދާޅުވީ ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީގެ 129 ވަނަ މާއްދާގެ (ހ) ގެ ދަށުން ވަޒީރުންގެ މަޖިލީހުގެ މެންބަރުންގެ ގޮތުގައި މި މަހު 17 ވަނަ ދުވަހު އައްޔަން ކުރެއްވި 20 ބޭފުޅުންގެ ނަންފުޅަށް މަޖިލީހުގެ ރުހުން ހޯއްދެވުމަށް ފޮނުވާފައިވާ ކަމަށެވެ. އަދި އެ މައްސަލަ ދިރާސާ ކުރެއްވުމަށް އެދިވަޑައިގަންނަވާ ކަމަށް އެ ސިޓީފުޅުގައި ރައީސް ވަނީ ވިދާޅުވެފަ އެވެ.

ސިޓީ އިއްވުމާއެކު މަޖިލީހުގެ ރައީސް ގާސިމް އިބްރާހިމް ވަނީ އެ މައްސަލަ ސަރުކާރުގެ މައްސޫލިއްޔަތު އަދާ ކުރާ މިންވަރު ބަލާ ކޮމިޓީއަށް ފޮނަން ނިންމައިފަ އެވެ.

ކެބިނެޓްއަށް އައްޔަންކޮށްފައިވާ ބޭފުޅުން:

ގާނޫނު އަސާސީގައިވާ ގޮތުން ކެބިނެޓް އައްޔަން ކުރާތާ ހަތް ދުވަސް ތެރޭގައި މަޖިލީހުގެ ރުހުން ހޯދަން ފޮނުވަން ޖެހޭނެ ކަމަށެވެ. ވަޒީރުންނަށް މަގާމުގައި ތިބެވޭނީ މަޖިލީހުގެ ރުހުން ލިބިގެންނެވެ.

ކެބިނެޓް ބަހާލާފައިވަނީ ޕާޓީތަކުގެ މެދުގަ އެވެ. އެގޮތުން އެމްޑީޕީއަށް ކެބިނެޓްގެ 40 ޕަސެންޓް ދީފައިވާއިރު ޖުމްހޫރީ ޕާޓީއަށް ދިނީ 25 ޕަސެންޓެވެ. ރައީސް މައުމޫނަށް 20 ޕަސެންޓް ދީފައިވާއިރު އަދާލަތު ޕާޓީއަށް ދިނީ 15 ޕަސެންޓެވެ. ރައީސް ސޯލިހުގެ ކެބިނެޓް ފައިނަލް ކުރެއްވީ ހަތަރު ލީޑަރުންނާއެކު ބައްދަލުވުމަށްފަހު އެވެ. އެ ބައްދަލުވުމަށް ލީޑަރުން ވަޑައިގެންނެވީ ކެބިނެޓަށް އެ ބޭފުޅުން އައްޔަން ކުރައްވަން ބޭނުންފުޅާ ބޭފުޅުންގެ ނަންތައް ހިއްޕަވައިގެންނެެވެ. އެ ބައްދަލުވުމުގައި ބައެއް ލީޑަރުން ވަނީ ކެބިނެޓްގެ ބައެއް މަގާމުތައް ދޫކުރައްވައި އެންމެން އެއްބަސްވާ ނަންތަކަށް ތާއިދު ވެސް ކުރައްވާފަ އެވެ.