އުމުރުން 65 އަހަރުގެ މީހުންނަށް ރައީސުލްޖުމްހޫރިއްޔާ ކަމަށް ކުރިމަތި ނުލެވޭ ގޮތަށް ގާނޫނު އަސާސީއަށް ގެނައި ބަދަލު އުވާލާ ކުރިން އޮތް ގޮތަށް ބަދަލު ކުރުމާ ބެހޭ ބިލު މަޖިލީހުން މިއަދު ބަލައިގެންފި އެވެ.
އެ ބިލު ބަލައިގަންނަން މަޖިލީހުން ފާސް ކުރީ 53 މެންބަރުން ވޯޓުންނެވެ. އެގޮތުން އެ ބިލު ފަސް މެންބަރުންގެ ވަގުތީ ކޮމިޓީއަކަށް ފޮނުވުމަށް ވެސް ފާސް ކުރި އެވެ. އެ ކޮމިޓީގައި ހިމެނިވަޑައިގަންނަަވަނީ އާރިފްގެ އިތުރުން ކުޅުއްދުއްފުށީ އުތުރު ދާއިރާގެ މެންބަރު އަބްދުއްގަފޫރު މޫސާ އާއި މަތިވެރި ދާއިރާގެ މެންބަރު ހުސެއިން މުހައްމަދުއާ، ކުޑަހުވަދޫ ދާއިރާގެ މެންބަރު އަހުމަދު އާމިރު އަދި އިސްދޫ ހުސެއިން ރަޝީދު އެވެ.
ގާނޫނު އަސާސީގެ 109 ވަނަ މާއްދާގެ (ނ)ގައި ކުރިން ބުނެފައި އޮންނަނީ ރައީސުލްޖުމްހޫރިއްޔާ ކަމަށް ކުރިމަތިލެވޭނީ އުމުރުން 35 އަހަރު ވުމުންނެވެ. ކުރިމަތި ނުލެވޭނެ ވަކި އުމުރެއް ބަޔާންކޮށްފައެއް ނުވެއެވެ. ނަމަވެސް 2015 ވަނަ އަހަރުގައި އެމްޑީޕީގެ ބައެއް މެންބަރުންގެ ތާއީދާއެކު 65 އަހަރުން މަތީ މީހުންނަށް ވާދަ ނުކުރެވޭ ގޮތަށް ގާނޫނު އަސާސީ ބަދަލު ކުރި އެވެ.
މިފަހަރު އަލުން ކުރިން އޮތް ގޮތަށް ބަދަލު ކުރުމަށް ހުށަހެޅީ ވެސް ޕީޕީއެމް ތަމްސީލު ކުރައްވާ ކެލާ ދާއިރާގެ މެންބަރު އަލީ އާރިފް އެވެ. އެ އިސްލާހަށް ބަހުސް ކުރައްވަމުން އާރިފް ވިދާޅުވީ އޮތް ގޮތް ބަދަލު ކުރަން ނިންމީ މިދިޔަ ދުވަސްތަކުގައި ރާއްޖޭގައި ހިނގައިދިޔަ ސިޔާސީ ކަންކަމަށް ބަލާފައި އެއީ އެންމެ ރަނގަޅު ގޮތް ކަމަށް ގަބޫލު ކުރެވޭތީ ކަމަށެވެ. އޭގެ އިތުރުން ދުނިޔޭގެ އެއްވެސް ތަނެއްގައި ވެރިކަން ކުރެވޭނެ އެންމެ މަތީ އުމުރެއް ކަނޑައަޅާފައި ނޯންނަ ކަމަށް ދިރާސާތަކުން ދައްކާތީ ކަމަށް ވެސް އާރިފް ވިދާޅުވި އެވެ.
"އެހެންވެ އަޅުގަނޑު ހިތަށް އެރީ ދުނިޔޭގެ އެހެން ގައުމުތަކުގައި ވެސް ކަން ހިނގާ ގޮތަށް ބަލާއިރު އަދި ރާއްޖޭގެ ފާއިތުވި ދުވަސްތަކުގައި ހިނގައިދިޔަ ކަންކަމަށް ބަލާއިރު އެންމެ ރަނގަޅު ގޮތަކީ ކުރިން އޮތް ގޮތަށް ގާނޫނު އަސާސީ ބަދަލު ކުރުން،" އާރިފް ވިދާޅުވި އެވެ.
ނަމަވެސް މިވަގުތަކީ ގާނޫނު އަސާސީ ބަދަލު ކުރަން އެންމެ ރަނގަޅު ވަގުތެއް ނޫން ކަމަށް އެމްޑީޕީއަށް ނިސްބަތްވާ ބައެއް މެންބަރުން ވިދާޅުވި އެވެ. އެގޮތުން ގަލޮޅު އުތުރު ދާއިރާގެ މެންބަރު އީވާ އަބްދުﷲ ވިދާޅުވީ ގާނޫނު އަސާސީ ބަދަލު ކުރަން ޖެހޭނީ ސިދާ ރައްޔިތުންނާ ގުޅުން ހުރި ކަންކަމުގައި ކަމަށާއި ވަކި ލެޖިސްލޭޓިވް އެޖެންޑާއެއްގެ ތެރެއިން ކަމަށެވެ.
ހިތަދޫ އުތުރު ދާއިރާގެ މެންބަރު ވެސް ވަނީ އަވަސް އަރުވާލައިގެން ގާނޫނު އަސާސީ ބަދަލު ކުރަން އުޅޭތީ ކަންބޮޑުވުން ފާޅުކޮށްފަ އެވެ. އޭނާ ވިދާޅުވީ ގާނޫނު އަސާސީ ބަދަލު ކުރުމަކީ ފަސޭހައިން ކުރެވޭ ކަމަކަށް ވެގެން ނުވާނެ ކަމަށާއި އިރުއިރުކޮޅާ ގާނޫނު އަސާސީ ބަދަލު ކުރަން ނުފެންނަ ކަމަށެވެ.
އުމުރުންް 65 އަހަރުން މަތީ މީހުންނަށް ކުރިމަތި ނުލެވޭ ގޮތަށް ގާނޫނު އަސާސީ އޮތުމުން ކުރިން އިންތިހާބުތަކުގައި ވާދަ ކުރެއްވި މިހާރުގެ މަޖިލީހުގެ ރައީސް ގާސިމް އިބްރާހިމްއަށް ވެރިކަމަށް އައުމުގެ ފުރުސަތު އޮތީ ގެއްލިފަ އެވެ.