ރައްޔިތުން މަޖިލީހުގެ މެންބަރުން ގަޑިއަށް މަޖިލީހަށް ނާންނާތީ ސުލޫކީ ކޮމިޓީއަށް އެ މައްސަލަ ފޮނުވައިގެން ފިޔަވަޅު އަޅުއްވާނެ ކަމަށް މަޖިލީހުގެ ރައީސް ގާސިމް އިބްރާހިމް ވިދާޅުވެއްޖެ އެވެ.
މަޖިލީހުގައި މިއަދު މުހިންމު މަސައްކަތްތަކެއް ކުރުމަށް ތާވަލުކޮށްފައިވާ އިރު ޖަލްސާ މިއަދު ހެނދުނު 9:00 ފަށަން އޮތީ ތާވަލްކޮށްފަ އެވެ. ނަމަވެސް މެންބަރުން މަޖިލީހަށް ގަޑިއަށް ވަޑައި ނުގަންނަވާތީ ކޯރަމް ހަމަ ނުވެގެން ގާސިމްއަށް ޖެހިވަޑައިގަތީ ޖަލްސާ 9:30އަށް ލަސް ކުރާށެވެ.
ގާސިމް ވިދާޅުވީ އެއްވެސް ސަބަބެއް ނެތި މެންބަރުން ގަޑިއަށް މަޖިލީހަށް ހާޒިރު ނުވަޑައި ނުގަންނަވާތީ މަޖިލީހުގެ ސުލޫކާ ބެހޭ ކޮމިޓީއަށް މިއަދު އެ މައްސަލަ ފޮނުވާ އެކަން ބަލާނެ ކަމަށް އުންމީދު ކުރާ ކަމަށެވެ.
"ވަރަށް ހިތާމައާއެކު އެހެންވެ އަޅުގަނޑު ޖަލްސާ ނިންމާލަން، ދެން އޮންނާނީ 9:30 ގައި،" ގާސިމް ވިދާޅުވި އެވެ.
އެއަކަމާ ބެހޭ ގޮތުން ތުލުސްދޫ ދާއިރާގެ މެންބަރު މުހައްމަދު ވަހީދު އިބްރާހިމް (ވައްޑޭ) ވިދާޅުވީ ސްކޫލު ކުދިންނަކީ ވަރަށް ގަޑިއަށް އެ މީހުން ދާން ޖެހޭ ސްކޫލަށް ދާ ބައެއް ކަމަށާއި ނަމަވެސް އެއަށް ވުރެ "ބޮޑު ކުދިން" ތަންތަނަށް ގަޑިއަށް ނާދެވޭ މަންޒަރު މަޖިލީހުން ފެންނަ ކަމަށެވެ.
މަޖިލީހުގައި މިއަދު ތާވަލުކޮށްފައި ވަނީ ބަޖެޓު ފާސް ކުރުމާއި އާ ބިލުތަކެއްގެ ފުރަތަމަ ކިޔުން އިއްވުން އަދި ގާނޫން އަސާސީއަށް ބަދަލު ގެންނަން ކޮމިޓީއިން ނިންމި ނިންމުން ވެސް ފާސް ކުރުމަށެވެ.