ރާއްޖެ އާއި އެމެރިކާގެ ގުޅުން އިތުރަށް ބަދަހިކޮށް، އެމެރިކާގެ އެހީތައް ރާއްޖެއަށް އިތުރުކުރެވޭނެ ދާއިރާތައް ދެނެގަތުމަށް އެ ގައުމުގެ އިސް ޑިޕްލޮމެޓުންގެ ވަފުދެއް ރާއްޖެ ވަޑައިގެން މަޝްވަރާތައް ފައްޓަވައިފި އެވެ.
ފޮރިން މިނިސްޓްރީން ބުނީ، އެމެރިކާގެ ސްޓޭޓް އަދި ކޮމާސް ޑިޕާޓްމެންޓުންނާއި ސްރީ ލަންކާގައި ހުންނަ އެމެރިކާގެ އެމްބަސީގެ މަންދޫބުން ރާއްޖެ ވަޑައިގެން ރާއްޖެއަށް މިހާރު ދިމާވެފައިވާ ދަތިތަކާމެދު މަޝްވަރާ ކުރެއްވުމަށް ވަނީ ހަމަޖެހިފަ އެވެ. އަދި އެ މަޝްވަރާތަކުގެ ތެރޭގައި ރާއްޖޭގެ ޖުޑީޝަރީ ހަރުދަނާ ކުރުމަށް ކުރެވެންހުރި ކަންކަމާއި ގުޅޭގޮތުން މަޝްވަރާ ކުރަން ހަމަޖެހިފައިވާ ކަމަށް ވެސް ފޮރިން މިނިސްޓްރީން ބުންޏެވެ.
ފޮރިން މިނިސްޓްރީން ބުނީ، މި ބައްދަލުވުންތަކަކީ އެމެރިކާ ސަރުކާރުން ރާއްޖެއަށް ކަނޑައެޅުއްވި އާ ސަފީރު، އަލައިނާ ޓެޕްލިޓްޒްއާއެކު ކުރެވުނު މަޝްވަރާތައް އިތުރަށް ކުރިއަށް ގެންދިއުމަށް ބޭއްވޭ ބައްދަލުވުންތަކެއް ކަމަށެވެ. އެގޮތުން އެމެރިކާގެ މަންދޫބުން މާދަމާގެ ނިޔަލަށް ރާއްޖޭގައި ތިއްބަވާނެ ކަމަށްވެސް ފޮރިން މިނިސްޓްރީން ބުންޏެވެ.
ފޮރިން މިނިސްޓްރީން ބުނީ، އެ ވަފުދުގައި ހިމެނޭ އެމެރިކާގެ ކޮމާސް ޑިޕާޓްމެންޓުގެ ބޭފުޅުން، ޕްލޭނިން މިނިސްޓްރީ އާއި ފިނޭންސް މިނިސްޓްރީއާ އިކޮނޮމިކް މިނިސްޓްރީއާ ޓްރާންސްޕޯޓް މިނިސްޓްރީއާ އެޓާނީ ޖެނެރަލް އޮފީހުގެ ބޭފުޅުންނާއި އެންވަޔަރުމަންޓް މިނިސްޓްރީ އަދި ޕޯޓްސްގެ ބޭފުޅުންނާއި ބައްދަލުކުރައްވާނެ ކަމަށެވެ.
އެމެރިކާގެ ސްޓޭޓް ޑިޕާޓްމެންޓްގެ ރޫލް އޮފް ލޯ އެޑްވައިޒާ ސްޓެފެން އެންޑަސަން ޕްރޮސެކިއުޓާ ޖެނެރަލް އޮފީހުގެ ބޭފުޅުންނާއި ޕޮލިހުންނާއި އެމްއެމްއޭގެ ބޭފުޅުންނާއި ޖުޑީޝަލް ސާވިސް ކޮމިޝަންގެ ބޭފުޅުންނާއި ރައީސް އިބްރާހިމް މުހައްމަދު ސޯލިހް ގާއިމް ކުރެއްވި ކޮރަޕްޝަން ތަހްގީގް ކުރާ ކޮމިޝަނާއި މަރުތަކުގެ ތަހްގީގް ކުރުމަށް އުފައްދާފައިވާ ކޮމިޝަންގެ ބެފުޅުންނާއި ބައްދަލުކުރައްވައި މަޝްވަރާ ކުރައްވާނެ ކަމަށް ފޮރިން މިނިސްޓްރީން ބުންޏެވެ.