މަހުޖަނުންގެ ނުފޫޒުން ރައްޔިތުން މަޖިލިސް ސަލާމަތް ކުރުމަށް ގޮވާލައި ރައީސް އިބްރާހިމް މުހައްމަދު ސޯލިހާއި، ސަރުކާރު ކޯލިޝަންގެ ހަތަރު ލީޑަރުންގެ ކުރިމަތީގައި މުޒާހަރާކުރީ އެއްވެސް ޕާޓީއަކާ ގުޅިގެން ނޫން ކަމަށާއި އެއީ އަމިއްލަ ހަރަކާތެއް ކަމަށް އެ މުޒާހަރާ އިންތިޒާމް ކޮށްގެން ކުރިއަށް ގެންދިޔަ މަދަނީ ހަރަކާތް، ނަވާނަވައިން ބުނެފި އެވެ.
ނަވާނަވައިން މުޒާހަރާ ކޮށްފައިވަނީ ރައީސް ސޯލިހް، ކޯލިޝަންގެ ހަތަރު ލީޑަރުން ކަމަށްވާ ކުރީގެ ރައީސް މައުމޫން އަބުދުލްގައްޔޫމާއި ކުރީގެ ރައީސް މުހައްމަދު ނަޝީދާއި މަޖިލިސް ރައީސް ގާސިމް އިބްރާހީމާއި ހޯމް މިނިސްޓަރު އިމްރާން އަބުދުﷲއާ ހޮޓެލް ޖެންގައި ބޭއްވި ބައްދަލުކުރެއްވުމަށްފަހު ޖެންގެ ލޮބީގައި ނޫސްވެރިންނާ ބައްދަލުކުރައްވަމުން ގެންދެވި ވަގުތުގައި އެވެ.
އެކަމާ ގުޅިގެން ކޯލިޝަންގައި ހިމެނޭ ބައެއް ފަރާތްތަކުން އެކަމާމެދު ނުރުހުން ފާޅު ކޮށްފައިވެއެވެ. އެގޮތުން މުޒާހަރާއަކީ ސަރުކާރު ކޯލިޝަން ރޫޅުމުގެ ފުރަތަމަ ސިގްނަލް ކަމަށް ކުރީގެ ނައިބު ރައީސް އަދި ޖުމްހޫރީ ޕާޓީ އެޑްވައިސަރު ޑރ. މުހައްމަދު ޖަމީލު ވިދާޅުވި އެވެ.
އެކަމާ ގުޅިގެން ނަވާނަވައިގެ ސްޕޯކްސް ޕާސަން ފާތިމަތު ޝާއިރާ ވިދާޅުވީ، އެ ހަރަކާތަކީ ވަކި ޕާޓީއަކާ ގުޅިގެން ކުރިއަށް ގެންދިޔަ ހަރަކާތެއް ނޫން ކަމަށާއި އެއީ އަމިއްލަ އިސްނެގުމުގެ މަތީން ކުރިއަށް ގެންދިޔަ ހަރަކާތެއް ކަމަށެވެ.
"ރާއްޖޭގައި މިހާރު އޮންނަ ހުރިހާ ޕާޓީތަކަކީ ވަކި ފިކުރަކަށް ނުވަތަ ވަކި މީހެއްގެ ވަށައިގެން އެނބުރޭ ފިކުރުތަކަކަށް ބިނާވެފައި އޮންނަ ޕާޓީތަކެއް، އެފަރާތްތަކާ ރައްޔިތުންގެ ބޮޑު ބަޔަކާ ގުޅުމެއް ނޯވެ،" ޝާއިރާ ވިދާޅުވި އެވެ.
ޝާއިރާ ވިދާޅުވީ، މަޖިލިސް އިންތިހާބާ ގުޅޭ ގޮތުން ހަތަރު ލީޑަރުންނާއި މަޝްވަރާ ކުރައްވާތީ ކަންބޮޑުވާ ކަމަށާއި އެފަރާތްތަކަކީ ރައްޔިތުން އިންތިހާބް ކޮށްފައިތިބި ލީޑަރުންނޫން ކަމަށެވެ. އަދި މަޖިލިސް އިންތިހާބްގެ ގޮނޑި ބެހުމާއި ގުޅޭގޮތުން އެފަރާތްތަކުން ގޮތް ނިންމުމަކީ ވަރަށް ބޮޑު ބޭއިންސާފެއް ކަމަށްވެސް ޝާއިރާ ވިދާޅުވި އެވެ.
ޝާއިރާ ވިދާޅުވީ، މަޖިލީހުގައި ފައިސާގެ ނުފޫޒު އޮތްވަރާއި ދެކޮޅު ކަމަށާއި މަހުޖަނުންގެ ނުފޫޒު މަޖިލީހަށް އޮވެގެންވާނެ ކަމަށް ގަބޫލު ނުކުރެވޭ ކަމަށެވެ. އަދި ވިދާޅުވީ، އަންނަ މަޖިލިސް އިންތިހާބުގައި އެފަރާތްތަކުން ވާދަ ކުރާނެ ކަމަށާއި އެކަމުގައި އެއްވެެސް މަހުޖަނެއްގެ ބައިވެރިވުން ނުހިމެނޭނެ ކަމަށްވެސް ޝާއިރާ ވިދާޅުވި އެވެ.
ގާތްގަނޑަކަށް 10 ވަރަކަށް ބޭފުޅުންނާއެކު އެބޭފުޅުން ކުރިއަށް ގެންދިޔައީ ހިމޭން އިހްތިޖާޖެކެވެ. އެއިހްތިޖާޖްގައި އެމީހުން ތިބީ ބޯޑްތަކަކާއި ފޮތިގަނޑުތަކެއް ހިފައިގެންނެވެ. ހަތަރު ލީޑަރުންގެ ކުރިމަތީ އެ ބޯޑްތަކާއި ފޮތިގަނޑު ހިފައިގެން ތިބުން ނޫން އިތުރުކަމެއް ކޮށްފައެއްނުވެ އެވެ.
ނޫސްވެރިންގެ ތެރޭގައި އެމީހުން ހިފައިގެން ތިބި ބޯޑްތަކުގައި ވަނީ، "މަހުޖަނުންގެ ނުފޫޒުން މަޖިލިސް ސަލާމަތްކުރޭ" އާއި "މަހުޖަނުން ވަގަށް ނެގި ރަށްތައް އަތުލާ" އަދި "މާލީ ބަޔާން ހާމަނުކުރާ ފަރާތްތައް މަޖިލިހަށް ނުހޮވާ" މިގޮތަށް ލިޔެފަ އެވެ.
މަޖިލިސް އިންތިހާބު ބޭއްވުމަށް ނިންމާފައިވަނީ އަންނަ އަހަރުގެ އޭޕްރީލް މަހުގެ ހަވަނަ ދުވަހު އެވެ. އަދި އަންނަ އަހަރުގެ ޖެނުއަރީ މަހުގެ ތެރޭގައި މަޖިލީހަށް ކުރިމަތި ލުމަށް ހުޅުވާލާނެ ކަމަށް އިލެކްޝަން ކޮމިޝަނުން ވަނީ ބުނެފަ އެވެ.