މޯލްޑިވްސް ތާޑްވޭ ޑިމޮކްރެޓްސް ޕާޓީ، އެމްޓީޑީ އިލެކްޝަން ކޮމިޝަން (އީސީ) ގައި ރަޖިސްޓާ ކޮށްފި އެވެ.
އީސީގައި މިއަދު ބޭއްވި ރަސްމިއްޔާތުގައި އެމްޓީޑީގެ ރެޖިސްޓާ ވަނީ އެޕާޓީގެ ވެރިޔާ ވިޔަފާރިވެރިންގެ ޖަމިއްޔާގެ ރައީސް އިސްމާއިލް އާސިފާ ހަވާލުކޮށްފަ އެވެ.
ރެޖިސްޓާ ހަވާލުކުރެއްވުމަށްފަހު ނޫސްވެރިންނާއި ބައްދަލުކުރައްވައި އީސީ ރައީސް އަހުމަދު ޝަރީފް އާދަމް ވިދާޅުވީ، މިއަދު ވަނީ އެމްޓީޑީ ރާއްޖޭގެ ހަތްވަނަ ޕާޓީއެއްގެ ގޮތުގައި ރެޖިސްޓާ ކޮށްފައި ކަމަށެވެ. ޝަރީފް ވަނީ އާސިފްއަށް މަރުހަބާ ދަންނަވާފަ އެވެ.
ޝަރީފް ވިދާޅުވީ، އުންމީދަކީ ސިޔާސީ ޕާޓީތަކުގެ ގާނޫނާއި ޕާޓީތައް ރެގިއުލޭޓް ކުރުމަށްޓަކައި ގަވާއިދުތަކާއި އެކަމަށް އީސީގެ ގައިޑްލައިނާ އެއްގޮތަށް ޕާޓީ ހިންގާނެ ކަމަށެވެ. އަދި ޕާޓީގެ މަގާމުތަކަށް ބޭފުޅުން އައްޔަން ކުރުން ކުރިއަށް އޮތް ތިން މަސް ދުވަހުގެ ތެރޭގައި ކުރިއަށް ގެންދާނެކަމަށް އުންމީދު ކުރައްވާ ކަމަށް ވެސް ޝަރީފް ވިދާޅުވި އެވެ.
ޝަރީފް ވިދާޅުވީ، މިއަދު ވަނީ ޕާޓީ ރެޖިސްޓްރީކޮށްދީ އެންމެ ފަހުން ޕާޓީން ބޭއްވި ޖަލްސާގައި ފާސްކުރި އަސާސީ ގަވާއިދުވެސް އެންޑޯސްކޮށްދީފައިވާ ކަމަށެވެ.
ޝަރީފް ވިދާޅުވީ، ސިޔާސީ ޕާޓީތަކުން ހިންގާ ހަރަކާތްތަކަށް އަބަދުވެސް އެއްބާރުލުންދޭނެ ކަމަށާއި ސިޔާސީ ޕާޓީތައް ރެޖިސްޓާ ކުރެވެނީ އެމަގުސަދަށްޓަކައި ކަމަށެވެ. އަދި ގާނޫނުތަކާއި ގަވާއިދުތަކާ އެއްގޮތަށް ހަރަކާތްތައް ހިންގުމަށް އެމްޓީޑީއަށް ޝަރީފް ވަނީ ގޮވާލާފަ އެވެ.
ރަސްމިއްޔާތުގައި އާސިފް ވިދާޅުވީ، އެމްޓީޑީ ފެނިގެންދާނީ ހަރަކާތްތެރި ޕާޓީއެއްގެ ގޮތުގައި ކަމަށާއި ޕާޓީއިން ނިންމާ ކަންކަމުގައި ރައްޔިތުންނާއެކު ސާބިތުވެ ތިބޭނެ ކަމަށެވެ. އަދި ކުރިއަށް އޮތް ތަނުގައި އިތުރު ހަރަކާތްތަކާއި އިތުރު ސިޔާސަތުތައް ހާމަވެގެންދާނެ ކަމަށާއި ކައުންސިލް ބައްދަލުވުމެއް ވަރަށް އަވަހަށް ބާއްވައި ކަންކަން ނިންމާނެ ކަމަށްވެސް އާސިފް ވިދާޅުވި އެވެ.
އެ ޕާޓީ ހަދަން ހުއްދަ ދީފައިވަނީ މިދިޔަ މަހުގެ 29 ވަނަ ދުވަހު އެވެ. އެ ދުވަހު ޕާޓީގެ ފުރަތަމަ މެންބަރުގެ ގޮތުގައި ކުރީގެ ނައިިބު ރައީސް އަހުމަދު އަދީބު ވަނީ ސޮއި ކުރައްވާފަ އެވެ. އެޕާޓީއަށް ވަނީ ވެލިދޫ ދާއިރާގެ މެންބަރު އަބްދުﷲ ޔާމީން ރަޝީދުވެސް ސޮއި ކުރައްވާފަ އެވެ. އެޕާޓީގެ ފުރަތަމަ ޖަލްސާ ބާއްވާފައިވަނީ މިދިޔަ ހޯމަ ދުވަހު އެވެ. އެ ޖަލްސާ ހާއްސަ ކުރީ އަހުމަދު އަދީބަށެވެ.