އާމިރްޚާން އާއެކު 2008 ވަނަ އަހަރު ނެރުނު، ފިލްމު "ގަޖިނީ"ގެ ދެވަނަ ބައެއް އުފައްދަން އުޅޭ ކަމަށް އިންޑިއާގެ ނޫސްތަކުން ބުނެފި އެވެ.
ބޮލީވުޑްގައި އާމިރްޚާން ކުޅުނު ފިލްމުތަކުގެ ތެރެއިން އެންމެ ތަފާތު އަދި އޭނާގެ އެންމެ މޮޅު އެއް ފިލްމުގެ ގޮތުގައި ގިނަ ބަޔަކު ދެކޭ ގަޖިނީ ފިލްމަކީ ބްލޮކްބަސްޓާއެކެވެ. ފިލްމުގެ ދެވަނަ ބައެއް އުފެއްދުމަށް ފިލްމުގެ ޕްރޮޑިއުސަރުން މަސައްކަތް ކުރާ ކަމަށް އިންޑިއާގެ ބޮލީވުޑް ހަބަރުތައް ގެނެސްދޭ ނޫސް "ޕިންކް ވިލާ" އިން ބުންޏެވެ. ގިނަ ހަބަރުތައް ބުނާ ގޮތުގައި ކުރީގެ ފިލްމުވެސް ޕްރޮޑިއުސް ކުރި މަދޫ މަންޓޭނާ އާއި އަލޫ އަރުވިންދް، "ގަޖިނީ" ގެ ދެވަނަ ބަޔެއް އުފައްދަން މިހާރު ރަޖިސްޓްރީ ކޮށްފި އެވެ.
އާމިރް ޚާންގެ "ގަޖިނީ" އަކީ ވިޔަފާރިވެރިއަކަށް ދިމާވާ ބޮޑު ހާދިސާއެއްގައި ހަނދާން ނެތި ޖެހި، ބަދަލު ހިފުންތަކެއް ދައްކުވައިދޭ ތަފާތު ފިލްމެކެވެ. މި ފިލްމުގެ ދެވަނަ ބަޔަށް ފިލްމު ޕްރޮޑިއުސަރުން ރަޖިސްޓްރީ ކޮށްފައި ވިޔަސް، ފިލްމުގައި އާމިރްޚާން ފެންނާނެ ކަމުގެ ޔަގީން ކަމެއް އަދި ނުދެ އެވެ.
އާމިރް ޚާންގެ ކެއުމަށް ބަދަލު ގެނެސް ހަށިގަނޑު ވަރުގަދަ ކުރަމުންދާ ކަމަށް މީގެ ކުރިން އަޑު ފެތުރުނެވެ. ނަމަވެސް، ހަށިގަނޑު ވަރުގަދަ ކުރަނީ މި ފިލްމަށް ތައްޔާރު ވުމަށް ކަމެއް ފިލްމުގެ ޕްރޮޑިއުސަރުން އަދި އާމިރް ޚާންވެސް ނުބުނެ އެވެ.