އެމްޑީޕީގެ ގިނަ މެމްބަރުންތަކެއް ރައްޔިތުންގެ މަޖިލީހުގައި ތިއްބެވުމަކީ ވަރަށް މުހިންމު ކަމެއް ކަމަށާއި، އަންނަ މަޖިލިސް އިންތިހާބުގައި އެމްޑީޕީއަށް ގިނަ ގޮނޑިތަކެއް ކާމިޔާބުވާ މަންޒަރު ފެންނަ ކަމަށް ރައީސް އިބްރާހިމް މުހައްމަދު ސޯލިހު މިރޭ ވިދާޅުވެއްޖެ އެވެ.
އެމްޑީޕީގެ ކެނޑިޑޭޓުންނާއި، އެ ކެނޑިޑޭޓުންގެ މަންދޫބުންނާއި ދާއިރާތަކުގެ ރައީސުންނާއެކު ބޭއްވި ބައްދަލުވުމެއްގައި ބައިވެރިވެ ވަޑައިގެން ރައީސް ސޯލިހު ވިދާޅުވީ، ކުރިއަށްއޮތް ރައްޔިތުންގެ މަޖިލީހުގައި "ކެންޑިޑޭޓުންނަކީ އެމްޑީޕީގެ ކެނޑިޑޭޓުން ކަމަށާއި، އެ ނޫން ކެންޑިޑޭޓެއް ނެތް" ކަމަށެވެ.
ރައީސް ސޯލިހު ވިދާޅުވީ، ރިޔާސީ އިންތިހާބު ކާމިޔާބު ވުމުގައި އެމްޑީޕީގެ ދައުރު ވަރަށް ބޮޑު ކަމަށާއި، ޖޭޕީ އާއި، އަދާލަތު ޕާޓީގެ އިތުރުން ރައީސް މައުމޫންގެ މަސައްކަތް އޮތްކަން ވެސް ހަދާނެއް ނުނެތޭ ކަމަށެވެ. ނަމަވެސް ސަރުކާރުން ވެފައިވާ ވައުދުތައް ފުއްދުމަށް މަޖިލީހުގެ ގިނަ ގޮނޑިތައް އެމްޑީޕީއަށް ލިބުން މުހިންމު ކަމަށެވެ.
މީގެ އިތުރުން 2008 ވަނަ އަހަރުން ފެށިގެން ބޭއްވި މަޖިލިސް އިންތިހާބުތަކުގައި އެމްޑީޕީއަށް މެޖޯރިޓީ ނެގޭގޮތްވެފައި ނުވާ ކަމަށާއި، އެ ތަޖުރިބާގެ އަލީގައި އެމްޑީޕިން މިހާރު ނުކުންނަނީ ވަރަށް ބޮޑަށް ތައްޔާރު ވެގެން ކަމަށް ރައީސް ސޯލިހު ވަނީ ވިދާޅުވެފަ އެވެ.