މާލޭގައި ހަދަމުންދިޔަ އިމާރާތެއްގެ ތިންވަނަ ބުރިން ބިއްލޫރި ކުޑަ ދޮރެއް މަގެއްގެ މައްޗަށް ވެއްޓިއްޖެ އެވެ.
ފުލުހުން ބުނީ މިރޭ 19:14 ހާއިރު، އިންފިނިޓީ ބިލްޑާސް ޕްރައިވެޓް ލިމިޓެޑުން މާފަންނުގައި ހަދަމުންދިޔަ ގެއެއްގެ ތިންވަނަ ބުރިން އަލުމިނިއަމް ބިއްލޫރި ކުޑަ ދޮރެއް ވެއްޓިފައިވާ ކަމަށެވެ. އަދި އެ ކުޑަ ދޮރު ވެއްޓިފައިވަނީ އެ ކުޑަދޮރު ހަރުކުރުމުގެ ތެރޭގައި ކަމަށެވެ.
ކުޑަދޮރު މަގުމައްޗަށް ވެއްޓި ތަޅައިގެންދިޔަ ކަމުގައިވީނަމަވެސް އެ ހާދިސާއާއި ގުޅިގެން އެއްވެސް މީހަކަށް ގެއްލުމެއް ލިބިފައިނުވާ ކަމަށް ފުލުހުން ވަނީ ބުނެފަ އެވެ.
މާލޭގައި ހަދަމުންދާ އިމާރާތްތަކުން އެއްޗެހިތައް ފޭބުމުގެ މައްސަލަ މި ފަހަކަށް އައިސް ވަނީ ބޮޑުވެފައެވެ. ދާދިފަހުންވަނީ ހަދަމުންދިޔަ އިމާރާތަކުން ވެއްޓުނު ސިމެންތި ބަސްތާއަކުން ޖެހި ކުޑަ ކުއްޖަކުވެސް ނިޔާވެފަ އެވެ.