މަޖިލީހުގެ އާންުމު ކޮމެޓީން އެކުލަވައިލި ރައްޔިތުން މަޖިލީހަށް ހުށަހަޅާ އިތުބާރު ނެތްކަމުގެ މައްސަލަތައް ކުރިޔަށް ގެންދާނެ ގޮތުގެ އުސޫލަށް ވޯޓަށް އެހުން މާދަމާއަށް އެޖެންޑާ ކޮށްފި އެވެ.
މާދަމާގެ މަޖިލިސް ޖަލްސާއަށް އެޖެންޑާ ކޮށްފައިވާ ކަންކަމަކީ "ސާކް ފްރޭމްވޯކް އެގްރީމަންޓް ފޯ އެނާޖީ ކޯޕަރޭޝަން (އިލެކްޓްރިސިޓީ)" ރާއްޖެއިން ތަސްދީގު ކުރުމާމެދު މަޖިލީހުގައި ދިރާސާކޮށް ގޮތެއް ނިންމަން އެ މައްސަލައާ ގުޅޭ ދާއިމީ ކޮމިޓީއަށް ފޮނުމެވެ.
މިނިސްޓަރުންނާއި ފަނޑިޔާރުން އަދި މިނިވަން މުއައްސަސާތަކުގެ މެންބަރެއްގެ އިތުބާރު ނެތް މައްސަލަތައް ކުރިޔަށް ގެންދާނެ ގޮތުގެ އުސޫލަށް އާންމު ކޮމިޓީއިން ނިންމި ގޮތަށް މަޖިލީހަށް ހުށަހެޅުމާއި ޓެކުހެއް އުނިކުރުމާއި ޓެކުހެއް އިތުރު ކުރުމުގެ ބިލްތައް ހަމައެކަނި ސަރުކާރުން ހުށަހަޅަންޖެހޭ ގޮތަށް ގެނައި އިސްލާހަށް ކޮމިޓީން ނިންމި ގޮތް ހުށަހެޅުންވެސް ވަނީ މާދަމާގެ ޖަލްސާއަށް އެޖެންޑާ ކޮށްފައި ވެއެވެ.
އެ ދެ އިސްލާހަށް މަޖިލީހުގައި ވޯޓަށް އެހުން މާދަމާގެ ޖަލްސާގައި އޮންނާނެ އެވެ.
މިދިޔަ ބުދަ ދުވަހު ބޭއްވި އާންމު ކޮމިޓީ އިން ފާސް ކުރި އިތުބާރުނެތް މައްސަލަތަކުގެ އުސޫލުގައިވާ ވަޒީރުންނާއި ފަނޑިޔާރުންނާއި މިނިވަން މުއައްސަސާތަކުގެ މީހުން ވަކި ކުރުމުގައި އަމަލު ކުރަންޖެހޭ ގޮތްތަކާއި އެ ފަރާތްތަކަށް ލިބިދޭން ޖެހޭ ހައްގުތަކާއި ޖަވާބު ދާރީވުމުގައި އަމަލު ކުރަން ޖެހޭ ގޮތްތައް ހިމަނާފައި ވެއެވެ.
އެގޮތުން އިތުބާރު ނެތް މައްސަލާގެ ދިފާއުގައި ވާހަކަ ދައްކަވާ ވަޒީރަކަށް، ފަނޑިޔާރަކަށް ނުވަތަ މިނިވަން މުއައްސަސާއެއްގެ މެންބަރަކަށް ގާނޫނީ ވަކީލުން ބޭނުންވެއްޖެ ނަމަ އެ ފުރުސަތު ދޭން ޖެހެ އެވެ. އެގޮތުން ބޭނުން ކުރެވޭނީ ގިނަ ވެގެން ދެ ވަކީލެއް ކަމަށް ގަވައިދުގައި ބުނެފައިވެ އެވެ.
ކުރިން އޮންނަ ގޮތުން އިތުބާރު ނެތް މައްސަލަތަކުގައި ޖަވާބު ދާރީވުމަށް ދެވޭނެ ގަޑި ކަނޑައަޅަނީ ވަކި ކޮމިޓީ ބައްދަލުވުމަކުންނެވެ. ނަމަވެސް އާ އިސްލާހުގައިވާ ގޮތަކުން ކޮންމެ ފަރާތަކަށް ވެސް ޖަވާބު ދާރީވުމަށް ދެ ގަޑިއިރުގެ ވަގުތު ދޭން ޖެހެ އެވެ.
ގަވައިދުގައިވާ ގޮތުން މަޖިލީހުގެ އަގުލަބިއްޔަތުން އިތުބާތު ނެތް މައްސަލަ ފާސްވެއްޖެ ނަމަ ގާނޫނު އަސާސީގެ 101 ވަނަ މާއްދާގެ (ރ) ގައިވާ ގޮތުގެ މަތިން އެ ހިނދުން އެ ހިނދަށް ވަޒީރު ވަކިވާނެ އެވެ.
އެހެންނަމަވެސް 2017 ވަނަ އަހަރުގެ ތެރޭގައި ސުޕްރީމް ކޯޓަށް އޭރުގެ ބަންޑާރަ ނައިބު މުހައްމަދު އަނިލް ހުށަހެޅުއްވި ދުަސްތޫރީ މައްސަލައެއްގެ ހުކުމްގައި އެ ބާރު ސުޕްރީމް ކޯޓުން ނަގާފައިވެ އެވެ. ސުޕްރީމް ކޯޓުން އެ ހުކުމްގައި ކަނޑައަޅާފައިވަނީ މަޖިލީހުން ފާސްކުރާ އިތުބާރު ނެތް ކަމުގެ މައްސަލަތަކުގައި ފަހު ބަސް ބުނާނީ އެ ކޯޓުން ކަމަށެވެ.
މަޖިލީހުން ފާސްކުރާ ކޮންމެ އިތުބާރު ނެތް ކަމުގެ މައްސަލައެއް ސައްހަކަން ކަނޑައަޅާނީ ގާނޫނު އަސާސީގެ ބެލެނިވެރި ފަރާތުގެ ހައިސިއްޔަތުން ސުޕްރީމް ކޯޓުން ކަމަށް އެ ހުކުމްގައިވެ އެވެ. އެހެންކަމުން ސުޕްރީމް ކޯޓުން ގޮތެއް ކަނޑަނާޅަނީސް، އިތުބާރު ނެތް ކަމަށް ފާސްކުރާ މީހެއްގެ މަގާމާމެދު ވަކި ގޮތެއް ކަނޑަނޭޅޭނެ އެވެ. އޭރު ވެސް ބައެއް ގާނޫނީ ބޭފުޅުން އެ ހުކުމް، ގާނޫނު އަސާސީއާ ފުށު އަރާކަން ފާހަގަކުރައްވާފައިވެ އެވެ.