ފިޓްނަސްގެ ދާއިރާއަށް ލޯބި ކުރާ މީހުން މިހާރު ރާއްޖޭގައި ވަރަށް ގިނަ އެވެ. ބަރުދަން ލުއި ކުރުމާއި ހަށިގަނޑު ބަދަލު ކޮށްލުމުގެ ގޮތުގައި ޖިމަކަށް ގޮސް ޖިމް ތެރޭގައި އުޅެމުން އެންމެ ފަހުން އެ ޖިމްގެ ޓްރެއިނަރުންނަށް ވެފައި ތިބި މީހުންޗވެސް މިހާރު ފެނެ އެވެ. ފިޓްނަސް އިންސްޓްރަކްޓަރަކަށް ވުމަށް، ސެޓިފައިޑް ވުމަކީ މުހިއްމު ކަމެވެ.
ދާއިރާއަށް ވަންނަން ބޭނުންވާ މީހުންނަށް ދިމާވާ ގޮންޖެހުމަކީ މާލޭގައި ހުރެގެން ފަސޭހަ ކަމާއެކު ބައިނަލްއަގުވާމީ ގޮތުން ގަބޫލު ކުރެވޭ ވަރުގެ ސެޓިފައިޑް އިންޓްރަކްޓަރަކަށް ވުމެވެ. އިވޯވް ޖިމް މިހާރު ކުރިއަށް ގެންދާ ޕާސަނަލް ފިޓްނަސް ޓްރެއިނަރުން ތަމްރީން ކުރުމުގެ ބައިނަލްއަގުވާމީ ކޯހަކީ ދުނިޔޭގެ ފެންވަރުގައި ބަލައިގަންނަ ކޯހެކެވެ.
"އިވޯވް" ޖިމް އާއި ޔޫރަޕިއަން އިންސްޓިޓިއުޓް އޮފް ފިޓްނެސް (އީއައިއެފް) ގުޅިގެން މިހާރު ކުރިއަށްދަނީ ޕާސަނަލް ޓްރެއިނަރުން ތަމްރީން ކުރުމުގެ މާސްޓާ ޓްރެއިނާ ޕްރޮގްރާމް އެވެ. މި ކޯހުގެ ތިއަރީ ބައި ކިޔަވައި ދޭނީ އެޕްލިކޭޝަނެއް މެދުވެރިކޮށް އޮންލައިންކޮންނެވެ.
ޕްރެކްޓިކަލް ބައި ކިޔަވައިދިނުމަށް ރާއްޖެއަށް ބޭރުން އަންނަ ޓްރެއިނަރެއް ހާއްސަ ކްލާސް ތަކެއް ނަގައިދޭނެ އެވެ. ޕްރެކްޓިކަލް ބައި ނަގައިދޭނީ އިވޯވް ޖިމްގަ އާއި ބައެއް އައުޓްޑޯ ސެޝަންތަކުގެ ގޮތުގަ އެވެ.
"އިވޯވް" ގެ ފަރާތުން ވާހަކަ ދައްކަމުން، އެ ޖިމްގެ އިސް ފަރާތެއް ކަމަށްވާ އައިޝަތު ޖީލާން ބުނި ގޮތުގައި، މި ކޯހުގެ ބޭނުމަކީ ދުނިޔޭގެ ފެންވަރުގައި ވެސް ގަބޫލު ކުރެވޭ ވަރުގެ ސެޓްފިކެޓް އެއް ޓްރެއިނަރުންނަށް ވުން ކަމަށެވެ. އަދި މި ޓްރެއިން ސެޝަންތަކުގެ ސަބަބުން ޖިމް އަށް ފަހު އަމިއްލަ އަށް މަސައްކަތް ކުރަން ބޭނުންވާ ކުދިންނަށް އެ ފުރުސަތ ޗވެސް ފުޅާ ވެގެންދާނެ ކަމަށް ބުންޏެވެ.
"އަޅުގަނޑުމެންގެ މި ޕްރޮގްރާމްގައި ވަރަށް އިންޑެޕްޓް ކޮށް ކިޔައިދޭނެ އެކި ކަހަލަ ކްލައިންޓުން ބަލަހައްޓާނީ ކިހިނެތްކަން. މިސާލަކަށް، ރާއްޖޭގަ ވަރަށް ގިނަ މިހާރު އާތްރައިޓިސް ޑައިބެޓިސް ކަހަލަ އެކި ބަލިތައް ހުންނަ މީހުން. އެކަހަލަ މީހަކު ޓްރެއިން ކުރާ ނަމަ އެމީހުންނަށް އެންމެ މުހިއްމު ވާނީ ކޮން ކަހަލަ ކަސްރަތުތަކެއް ކަމާއި އެމީހުންގެ ޑައެޓް ޕްލޭން ހެދުމުގައި ވިސްނަން ޖެހޭނީ ކޮން ގޮތްތަކަކުން ކަމަށްވެސް ކިޔައިދޭނެ،"
އިތުރަށް ބުނީ، އީއައިއެފް އިން ގެންދާ ޓްރެއިނިންގް ސެޝަންތަކުގައި ބޮޑަށް ބަލާނީ ފިޒިކަލް ޓްރެއިނިންގެ ބޭސިކް ބައިތައް ކިޔައިދިނުމުގެ ބަދަލުގައި އޭގެ އެންމެ ފުނަށް ދިއުން ކަމަށެވެ.
ޔޫކޭގެ ޓްރެއިނަރުން ކިޔަވައިދޭ މި ކޯހުގައި މިހާރު ކުރިއަށްދަނީ ކޯހުގެ ފުރަތަމަ ބެޗް އެވެ. މި ބެޗްގައި މިހާރު ޓްރެއިންވެ، އަންނަ މަހު ބައިނަލްއަގުވާމީ ގޮތުން ގަބޫލުކުރާ ސެޓިފައިޑް އިންސްޓްރަކްޓަރުންގެ ގޮތުގައި 12 މެމްބަރުން ނިކުންނާނެ އެވެ. މި މެމްބަރުންގެ ތެރޭގައި ފިޓްނަސް އިންސްޓްރަކްޓަރުންގެ ގޮތުގައި މިހާރު ވެސް މަސައްކަތްކުރާ މީހުން އެބަ ތިއްބެވެ.
"އިވޯވް"ގައި މިހާރުވެސް މަސައްކަތް ކުރަމުން އަންނަ އަދި މި ކޯހުގައި ބައިވެރިވެފައިވާ ޓްރެއިނަރެއް ކަމަށްވާ މުހައްމަދު މަޒީން އަބްދުﷲ ބުނި ގޮތުގައި މި ޓްރެއިނިންގެ ސަބަބުން ވަރަށް ބޮޑު ތަފާތެއް ފެނިގެން ގޮސްފި ކަމަށެވެ.
"މި ކޯހުގައި ވަރަށް ތަފްސީލުކޮށް އެބަކިޔައިދޭ މި ކަހަލަ މަސްލްސް ބިލްޑު ކުރުމަށް ހަދާނީ ކިހިނެތްކަން، އެކި މީހުންގެ ހަށިގަނޑާއި ކޮންމެ ކޮންމެ ޓްރެއިނިން އަކާ ތަފާތު ވާނެ ކަން. އެމީހަކާ ގުޅުވައިގެން ޓްރެއިނިން ދޭނެ ގޮތާއި މިސާލަކަށް މާބަނޑު މީހެއް އަންނަ ކަމުގައި ވާނަމަ އެމީހަކު ކުރުވާނީ ކޮންކަހަލަ ކަސްރަތުތަކެއް ކަންވެސް ވަރަށް ބޮޑަށް ކިޔައިދިން. އެކަހަލަ އެއްޗެހި އެންމެ ފުނަށް އެނގުމުން ވަރަށް ފަސޭހަ ވެގެންދާނެ"
ޔޫރަޕިއަން އިންސްޓްޓިއުޓް އޮފް ފިޓްނަސްއަކީ 2005ވަނަ އަހަރުން ފެށިގެން ފިޒިކަލް އިންސްޓްރަކްޓަރުން ތަމްރީން ކުރަމުން އަންނަ އިންސްޓިޓުއުޓެކެވެ. މިހާތަނަށް އެކިގައުމުތަކުން 3،000 ވުރެ ގިނަ ބައިވެރިން މި އިންސްޓިޓިއުޓުން ވަނީ ތަމްރީންވެ، ދުނިޔޭގެ ފެންވަރުގައި ގަބޫލުކުރެވޭ ސެޓިފައިޑް އިންސްޓްރަކްޓަރުންނަށް ވެފަ އެވެ
"އިވޯވް" ޖިމްގެ ހާއްސަ އެހެން ކަމެއްވެސް އެބަ އޮވެ އެވެ. މިއީ ޖިމްއަށް ގޮސް ދެތިން ގަޑިއިރު ހޭދަކޮށްފައި ނިކުންނަން ފަސޭހަ ވާނެ ޖިމް އެއް ނޫނެވެ. ޖިމް ހަދާފައިވަނީ ޖިމް އާއި ޓްރެއިނިންގް ރޫމްގެ މެދުގައި ހާއްސަ ކޮފީ ބޯ ތަނެއްވެސް ހިމަނައިގެންނެވެ. "އިވޯވް" އިން ބުނި ގޮތުގައި މިހެން ހެދުމުގެ ބޭނުމަކީ، ޖިމް އަށް ފަހު އިންސްޓްރަކްޓަރުންނާއެކު ކޮފީ އެއް ބޯލާ އިތުރަށް އޮޅުންފިލުވަން ބޭނުންވާ ކަމެއް އޮތިއްޔާ ވާހަކަ ދައްކާލާ ހެދުމެވެ. ޖިމް ހުންނަ ފްލޯގައި ހަދާފައިވާ މި ކުޑަ ކެފޭ އިން، ކޮފީގެ އިތުރުން، ސިއްހަތަށް ފައިދާވާ ލުއި ކެއުންވެސް ލިބެ އެވެ. އެގޮތުން، ޕްރީމޭޑް އޯޓްމީލްސްފަދަ އެތައް ފައިދާއެއް ލިބޭ ކެއުން މި ކެފޭ އިން ފަސޭހައިން ލިބެ އެވެ.
"އިވޯވް" ޖިމް ހުޅުވިތާ އަދި ވީ އެންމެ ފަސް މަހެވެ. "އިވޯވް" އިން ބުނިގޮތުގައި މިވީ ކުޑަދުވަސްކޮޅުގެ ތެރޭ ރާއްޖޭގައި ފިސިކަލް އިންސްޓްރަކްޓާ އަކަށް ވުމަށް ބޭނުންވެފައިތިބި މީހުންގެ ސަޕޯޓް ވަރަށް ފުރިހަމައަށް ލިބޭ ކަމަށެވެ. "އިވޯވް"އިން ކުރިއަށްގެންދާ މި ކޯހުގެ ދެވަނަ ބުރު އޮންނާނީ ސެޕްޓެމްބަރުގަ އެވެ. ރެޖިސްޓްރީ ވުން އޮންނާނީ އޮގަސްޓުގެ ނިޔަލަށެވެ.