ދުންފަތުގެ އިސްތިއުމާލު ކުރުމަކީ އިންސާނީ ސިއްހަތަށް ނުހަނު ބޮޑު ގެއްލުމެއް ލިބިގެންދާ ކަމެކެވެ. މި ނުބައި އާދައިގެ ސަބަބުން އަޅުގަނޑުމެންގެ ޖިސްމާނީ އަދި ނަފްސާނީ ދުޅަހެޔޮ ކަމަށް ބޮޑެތި އަނިޔާތަކެއް ލިބިގެންދެ އެވެ.
ދުންފަތުގެ އިސްތިއުމާލު ކުރުމުގެ ސަބަބުން ކެންސަރު ޖެހުމުގެ ނުރައްކާ އިތުރުވެ، ފުއްޕާމޭގެ ކެންސަރު، ދަތްދޮޅީގެ ކެންސަރު، އަދި އެހެނިހެން ބާވަތްތަކުގެ ކެންސަރު ޖެހުމުގެ ފުރުސަތު ބޮޑުވެގެންދެ އެވެ. މީގެ އިތުރުން ނޭވާލުމުގެ ނިޒާމަށް ލިބޭ ގެއްލުމުގެ ސަބަބުން ފުއްޕާމޭގެ މަސައްކަތް ދަށްވެ، ނޭވާގެ ހާސްކަން ފަދަ ބަލިތައް ޖެހުމުގެ ފުރުސަތު އިތުރުވެގެންދެ އެވެ.
ދުންފަތުގެ އިސްތިއުމާލު ކުރުމުގެ ސަބަބުން ހިތުގެ ބަލިތަކަށް ހުށަހެޅުމާއި، ލޭހޮޅިތައް ބެދި، ހިތުގެ ބަލިތަކާއި ސްޓްރޯކް ޖެހުމުގެ ފުރުސަތުވެސް އޮވެ އެވެ. އަދި ހަށިގަނޑުގެ ދިފާއީ ނިޒާމު ދަށްވެ، އެކި ބާވަތުގެ ބަލިތަކަށް ހަށިގަނޑު ހުޅުވިގެންދެ އެވެ.
ދުންފަތަކީ ހަމުގެ ސިއްހަތަށް ވެސް ނޭދެވޭ އަސަރުކޮށް، ޅަފަތުގައި މުސްކުޅިވުމުގެ އަލާމާތްތައް ފެންނަ ކަމެކެވެ. މީގެއިތުރުން އެ ނުބައި އާދަ ގައިގައި ހަރުލުމުގެ ސަބަބުން ސިކުނޑީގެ މަސައްކަތް ދަށްވެ، އުފެއްދުންތެރިކަމާއި ވިސްނުންތެރިކަން ދަށްވެގެންދެ އެވެ.
ދުންފަތުގެ އިސްތިއުމާލު ކުރުމުގެ ސަބަބުން އިޖުތިމާއީ ގުޅުންތަކަށްވެސް ނޭދެވޭ އަސަރު ކުރެ އެވެ. ދުންފަތުގެ އިސްތިއުމާލު ކުރާ މީހުންގެ ވަށައިގެންވާ މީހުންނަށް ޕެސިވް ސްމޯކިންގެ ސަބަބުން ގެއްލުން ލިބި، އިޖުތިމާއީ ގުޅުންތައް ރޫޅިގެންދެ އެވެ. އަދި މާލީ ގޮތުންވެސް ބުރަ އިތުރުވެ، ސިގިރެޓަށް ހޭދަކުރަންޖެހޭ ފައިސާގެ އިތުރުން، ސިއްހީ ފަރުވާއަށް ހޭދަކުރަންޖެހޭ ފައިސާގެ މިންވަރު އިތުރުވެ އެވެ.
ވޭޕް ކުރުމާއި ސީޝާ ބުއިމަކީވެސް ދުންފަތުގެ އިސްތިއުމާލު ކުރުމާ އެއްފަދައިން ނުރައްކާތެރި ކަންކަމެވެ. އެއީ މާ ކޫލް ކަންކަމެއް ނޫނެވެ. މި ދެ ކަމުގެ ސަބަބުންވެސް ނިކޮޓިންގެ ވަބާގައި ޖެހި، ދޫކޮށްލަން އުނދަގޫވެ އެޑިކްޓް ވެއެވެ. އަދި ފުއްޕާމެއަށް ލިބޭ ގެއްލުމުގެ ސަބަބުން ނޭވާލުމުގެ ދަތިކަން ކުރިމަތިވެ އެވެ. ހިތުގެ ސިއްހަތަށްވެސް ނޭދެވޭ އަސަރުކޮށް، ހިތުގެ ހަރަކާތް އަވަސްވެ، ލޭގެ ޕްރެޝަރު މައްޗަށް ދިއުމުގެ ނުރައްކާ އޮވެ އެވެ.
ވޭޕް އާއި ސީޝާގެ ދުރުރާސްތާގެ އަސަރުތަކާ ބެހޭ ފުރިހަމަ މައުލޫމާތު ނެތުމަކީ އިތުރު ނުރައްކަލެކެވެ. ހާއްސަކޮށް ޒުވާނުންގެ މެދުގައި މި ކަންކަން އާންމުވެފައި ވުމަކީ އެތައް ޖީލެއްގެ ސިއްހަތަށް ނުރައްކާވެދާނެ ކަމެކެވެ.
ށމޮކިމގދުންފަތުގެ އިސްތިއުމާލު ކުރުމަކީ އަމިއްލަ ނަފްސަށާއި، އާއިލާއަށާއި، މުޖުތަމައަށް ލިބޭ ނުހަނު ބޮޑު ގެއްލުމެކެވެ. މިއަދުން މިއަދަށް މި ނުބައި އާދަ ދޫކޮށްލުމަށް ނިންމަންޖެހެ އެވެ.
ދުންފަތުގެ އިސްތިއުމާލުކުރުން ހުއްޓާލުމުން ސިއްހަތު ރަނގަޅުވެ، އުމުރު ދިގުވުމުގެ ފުރުސަތު އޮވެ އެވެ. މާލީ ހާލަތު ރަނގަޅުވެ، ސިގިރެޓަށް ހޭދަކުރާ ފައިސާ ރައްކާކުރެވި، އިތުރު ކަންކަމަށް އިންވެސްޓް ކުރުމަށް ބާރަކަށް ވާނެ އެވެ. އާއިލީ ގުޅުން ބަދަހިވެ، އާއިލާގެ މެންބަރުންނާއެކު ހޭދަކުރާ ވަގުތު އިތުރުވެގެންދާނެ އެވެ. އުފެއްދުންތެރިކަމާއި ހަށިގަނޑުގައި ހަކަތަ އިތުރުވެ، މަސައްކަތުގައި ކުރިއެރުން ލިބިގެންދާނެ އެވެ. އަދި ދުޅަހެޔޮ ދިރިއުޅުމެއް އުޅުމުން އެހެން މީހުންނަށް ހެޔޮ ނަމޫނާއަކަށް ވެވޭނެ އެވެ.