ޔުނައިޓެޑް ވިކްޓަރީ

ނަޒީހުގެ ތައުރީފު ކީޕަރަށް

އެންމެ ފަހުން ޓީސީއާ ދެކޮޅަށް ކުޅުނު މެޗަށް ފަހު ގޯލްކީޕިންއަށް ހައްލު ގެނައުމުގެ ގޮތުން ބަދަލުތަކެއް ގެންނަންޖެހޭ ކަމަށް ވާހަކަ ދެއްކި ނަމަވެސް، އެގޮތަށް އަމަލު ނުކުރާނެ ކަމަށް ޔުނައިޓެޑް ވިކްޓަރީގެ ކޯޗް މުހައްމަދު ނަޒީހް ބުނެފި އެވެ.

ނަޒީހު ބުނީ ޔުނައިޓަޑް ވިކްޓަރީގެ ކީޕަރު ތޮލާލް ހަސަން (ތޮޕްލެކް) އާ މެދު އިތުބާރު އެބަ އޮތް ކަމަށާއި، ރަނގަޅަށް ކުޅޭ ދުވަހު ތައުރީފު ކޮށްފައި ނުރަނގަޅު ދުވަހު އެކަންވެސް ފަހާގަ ކުރަން ޖެހޭނެ ކަމަށެވެ.

"އެ ގަޑީގައި ޑިސަޕޮއިންޓްމެންޓް އައީ،" ޓީސީ މެޗަށް ފަހު ދެއްކި ވާހަކަތަކަށް އިޝާރާތްކޮށް ނަޒީހް ބުންޏެވެ. "ތޮލާ ވަރަށް ވަރަށް ގޯހީކީ ނޫން، ހަމަ ފެންނާނެ ބޮޑެތި ލީގްތަކުގައި ވެސް ކީޕަރުން އަތުން އެބަހިނގާ ވަރަށް އާދައިގެ މިސްޓޭކުން."

"އެއީ އެއްގޮތަކަށް ވެސް ކޯޗް މާފަށް އެދެންޖެހޭ ސަބަބެއް ނޫން، ރަނގަޅު ދުވަހު ވަރަށް ރަނގަޅޭ ކޯޗަށް ބުނެވެންޏާ ގޯސް ދުވަހު ގޯހޭ ބުނުމުގެ ފުރުސަތު ވެސް ކޯޗަށް އޮންނަން ވާނެ، އެހެން ނޫނިއްޔާ މީތި ހަމަހަމައެއް ނުވޭތާ.

ނަޒީހު ބުނީ، ކީޕަރުގެ ރަނގަޅު ދުވަހު ތައުރީފު ކޮށްފައި ވެސް ވާހަކަ ދައްކާފައި ހުންނާނެ ކަމަށެވެ. ގޯސް ދުވަހު އެ ވާހަކަ ބުނީމަ ގޯލްކީޕަރުންނާއި ކީޕަރުންނަށް ހެޔޮ އެދޭ މީހުންނަށް އެކަން ބަލައި ނުގެނެވޭނަމަ ކަމަށް ވާހަކަ ދައްކާއިރު ތައުރީފު ކުރަނީ ވެސް އަދި ގޯހޭ ބުނަނީ ވެސް އެކަކުކަން ދަންނަން ޖެހޭ ކަމަށެވެ.

ޔުނައިޓަޑް ވިކްޓަރީ މިއަދު ނުކުންނާނީ، ދަ ގުރޭންޑޭއާ ދެކޮޅަށެވެ. އެ މެޗުގައި ތޮލާލް ނުފެންނާނެ އެވެ. ނަޒީހު ބުނީ ޕްރެކްޓިސް ކުރަނިކޮށް އޭނާގެ އަތަށް އަނިޔާއެއްވެފައިވާ ކަމަށާއި އިތުރު ރިސްކެއް ނުނެގުމުގެ ގޮތުން ދެ ވަނަ ކީޕަރަށް ފުރުސަތު ދޭނެ ކަމަށެވެ.

"ވަން އޮން ވަން ސިޓްއޭޝަންގައި ތޮލާއަކީ ރާއްޖޭގެ ހުރި އެންމެ މޮޅު ކީޕަރު،" ޓޮޕްލެކްއަށް ތައުރީފް ކުރަމުން ނަޒީހް ބުންޏެވެ. "އެހެންމީހަކު ބުނެފާނެ އެހެން ކީޕަރެއްގެ ވާހަކަ، އެކަމަކު ވަން އޮން ވަން ސިޓްއޭޝަންގައި އަޅުގަނޑަށް ފެނުނު އެންމެ މޮޅު ދިވެހި ކީޕަރަކީ ތޮލާ."

މިއަދު ދެކޮޅަށް ނިކުންނަ ދަ ގުރޭންޑޭ ޓީމާ ބެހޭގޮތުން ސުވާލު ކުރުމުން ނަޒިޙް ބުނީ، އިދިކޮޅު ޓީމާ ބެހޭގޮތުން ކޮމެންޓް ކުރުމަކީ އޭނާ ކުރަން ބޭޏުންވާ ކަމެއް ނޫން ކަމަށާއި ދަ ގުރޭންޑޭ އޮތީ ރަނގަޅު ފޯމެއްގައި ކަމަށެވެ.