މިނިވަން ދުވަހަށް މުޅި މާލެ މިވަނީ "ބަދަލުވެފަ އެވެ" ކުލަ ބޮކިތައް ދިއްލައި ޒީނަތްތެރިކޮށްފަ އެވެ. ނަލަ ހައްދާލާފަ އެވެ. މި ބަދަލުގެ ތެރެއިން ޖުމްހޫރީ ބިނާ ވެސް މި ވަނީ ސަޅިކޮށްލައި، އަލުން ހުޅުވާފަ އެވެ. ނަމަވެސް މި ފަހަރު ހުޅުވިއިރު ޖުމްހޫރީ ބިނާއިން ހާއްސަ ކަމެއް ފާހަގަ ކުރެވެ އެވެ. އެ ކަމަކީ ބިނާގައި "ޖައްސާފައި" ތިބޭ ދޫނިތަކެވެ. ނަމަވެސް މި ދޫނިތަކަކީ ރާއްޖޭގައި އުޅޭ ދޫނިތަކެއް ނޫނެވެ.
(ފޮޓޯއިން) އެ ފެންނަ ދޫނިތަކަކީ އާއްމު ގޮތެއްގައި ފިނި ގައުމުތަކުގައި އުޅޭ ދޫންޏެއް ކަމަށްވާ "ފްލެމިންގޯ" އެވެ. ޖުމްހޫރީ ބިނާ ހުޅުވިއިރު، ބިނާގެ ފެންގަނޑު ތެރޭގައި "ފެން ބޯން" އެ ތިބި ފްލެމިންގޯ ތަކަކީ ދިރޭ ދޫންޏެއް ނޫނެވެ. ޕްލާސްޓިކުން ހަދާފައިވާ މި ދޫނިތައް ފެނި ބައެއް ޓޫރިސްޓުން އޭގެ ކައިރިއަށްދެ އެވެ. ބިނާގެ ހަރުފަތްގަނޑު މައްޗަށް އަރައި، އެ ދޫނިތަކާއެކު ފޮޓޯ ވެސް ނަގަ އެވެ. ދޫނިތަކުގައި އަތްލާ ވެސް ހަދަ އެވެ. މި ދޫނިތަކުގެ ސަބަބުން ޖުމްހޫރީ ބިނާއަށް އިތުރު ފުރިހަމަ ކަމެއް ގެނެސްދީފި އެވެ. ނަމަވެސް މި ފުރިހަމަކަމަށް ހިޔަނި އެޅެނީ، ހަމަ އެންމެ ކަމެކެވެ. އެ ކަމަކީ މި ދޫނިތައް ރާއްޖޭގެ މާހައުލާ ނުގުޅުމެވެ.
"ވަރަށް ސަޅިވީސް ހޯރަ ނޫނީ މާރަނގަ ކަހަލަ ދޫންޏެއް އެތަނުގައި ބެހެއްޓިނަމަ. އޭރުން ގައިމު ވެސް ރާއްޖޭގެ މާހައުލާ ގުޅޭނެ،" ޓުއާ ގައިޑެއްގެ ހިޔާލު ހިއްސާ ކުރި އެވެ.
ކުރީގެ ރައީސް މައުމޫނު އަބްދުލް ގައްޔޫމުގެ ވެރިކަމުގައި، ހަދާފައިވާ މި ބިނާ މިހާރު މިވަނީ އިތުރަށް ފުރިހަމަ ވެފަ އެވެ. ނަމަވެސް ހަމައެކަނި ފަޅު ކަމަކީ ރާއްޖޭގައި ނޫޅޭ ދޫނިތަކެއް ޖުމްހޫރީ ބިނާގައި "ޖައްސައިގެން" ތިބުމެވެ.