ދައުލަތަށް ލިބެންޖެހޭ ފައިސާގެ ތެރެއިން ނުލިބިހުރި 3.7 ބިލިއަން ރުފިޔާ ހޯދާފައިވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ޖުމްހޫރީ ދުވަހާ ގުޅުވައިގެން ދަރުބާރުގޭގައި ރޭ ބޭއްވި ހާއްސަ ޖަލްސާގައި ރައީސް މުއިއްޒު ވިދާޅުވީ ނުލިބިހުރި ފައިސާ ހޯދުމަށް ސަރުކާރުން ގިނަ މަސައްކަތްތަކެއް ކޮށްފައިވާ ކަމަށެވެ.
އެ ގޮތުން ގާނޫނުތަކާއި ގަވާއިދުތައް އިސްލާހުކޮށް ތަންފީޒީ ދާއިރާތައް ވަރުގަދަކޮށްފައިވާ ކަމަށް ރައީސް މުއިއްޒު ވިދާޅުވި އެވެ.
"ސަރުކާރަށް އެކި ފަރާތްތަކުން ދައްކަންޖެހިފަ ކުރީ ދުވަސްތަކުގައި ނުހޯދާ ފަސޭހަކޮށްލާފަ ހުރި 3.7 ބިލިއަން ރުފިޔާ. ރައްޔިތުންގެ ފައިސާ ހޯދާފަ ރައްޔިތުންގެ އެކައުންޓަށް ވައްދައިފިން،" ރައީސް ވިދާޅުވި އެވެ.
އޭގެ ސަބަބުން ނަގަން ޖެހޭ ދަރަނި މަދުވެފައިވާ ކަމަށް ރައީސް މުއިއްޒު ވިދާޅުވި އެވެ.
ރައީސް މުއިއްޒު ވިދާޅުވީ ބައިނަލްއަގުވާމީ މާލީ އިދާރާތަކުގެ ލަފާއާއެކު އަންނަ އަހަރުގެ ދައުލަތުގެ ބަޖެޓުގައި ސަބްސިޑީ އާއި އާސަންދަ އާއި ޕެންޝަން ނިޒާމުގެ އިތުރުން ސަރުކާރު ހިއްސާވާ ކުންފުނިތަކާ ގުޅޭ މުހިންމު އިސްލާހުތަކެއް ހިމަނާފައިވާ ކަމަށެވެ.
އެ އިސްލާހުތައް ބައްޓަންކޮށްފައިވަނީ އެންމެ ނިކަމެތި މީހާއަށް މިހާރަށްވުރެވެސް ރަނގަޅަށް އެހީތެރިކަން ލިބޭ ގޮތަށް ކަމަށް ރައީސް މުއިއްޒު ވިދާޅުވި އެވެ.