ބޮޑު ތިން ނިންމުމެއް ނިންމެވުމަށް ރައްޔިތުންގެ ފެންނަ ނުފެން ވޯޓަކަށް ދާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ޖުމްހޫރީ ދުވަހާ ގުޅުވައިގެން ރޭ ދަރުބާރުގޭގައި ބޭއްވި ޖަލްސާގައި ރައީސް މުއިއްޒު ވިދާޅުވީ ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއްކޮށްލުމަށާއި ރިޔާސީ ދައުރު ބަދަލުވާ ދުވަސް ނޮވެމްބަރު 11އަށް އަލުން ބަދަލުކޮށް ރިޔާސީ އިންތިހާބު ފުރަތަމަ ބުރުން ކާމިޔާބުވާ ގޮތް ހެދުމަށް ރައްޔިތުންގެ ފެންނަ ނުފެންނަ ވޯޓަކަށް ދާނެ ކަމަށެވެ.
ރާއްޖެ ފަދަ އާބާދީ ކުޑަ ގައުމެއްގައި އެންމެ ރަނގަޅު ގޮތަކީ ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއްކޮށް ބޭއްވުން ކަމަށް ރައީސް މުއިއްޒު ވިދާޅުވި އެވެ.
"ދެ އިންތިހާބާ ދޭތެރޭގައި މި އޮންނަނީ ދެ ތިން ހަތަރު މަސް ނޫންތޯ؟ އެތައް ހަރަދެއް އެބަ ހިނގާ. އިލެކްޝަންސް ކޮމިޝަނުން އެކަނި ވެސް އެތައް ސަތޭކަ މިލިއަނެއް އެބަ ހަރަދުކުރަންޖެހޭ،" ރައީސް މުއިއްޒު ވިދާޅުވި އެވެ.
އޭގެ ބަދަލުގައި ދެ އިންތިހާބު އެކުގައި ބޭއްވުމަށް ރައްޔިތުންގެ ފެންނަ ނުފެންނަ ވޯޓަކަށް އަހާނެ ކަމަށް ރައީސް މުއިއްޒު ވިދާޅުވި އެވެ.
"ރައްޔިތުން ބޭނުންފުޅުވަންޏާ ދެން އަންނަ ރިޔާސީ އިންތިހާބަކާއެކީގައި އޮންނާނެ ރައްޔިތުންގެ މަޖިލިސް އިންތިހާބު،" ރައީސް ވިދާޅުވި އެވެ.
ޖުމްހޫރީ ދުވަހަކީ ނޮވެމްބަރު 11 ނަމަވެސް ރައީސުލްޖުމްހޫރިއްޔާ މަގާމުގެ ހުވާ މިހާރު ކުރައްވަނީ ނޮވެމްބަރު 17 ގައި ކަން ފާހަގަކުރައްވާ ރައީސް މުއިއްޒު ވިދާޅުވީ ސިޔާސީ އޮއިވަރެއްގައި ޖެހި ޖުމްހޫރީ ދުވަސް ހަފުތާއެއް ކައްސާލާފައިވާ ކަމަށެވެ.
"އަޅުގަނޑު އަމިއްލައަށް ނިންމާލެވޭ ވަރުގެ ކަމެއް ނޫނޭ އެއީ. އެކަމަކު ގާނޫނު އޮތް ގޮތުން އަދި މިތިބަ އިއްޒަތްތެރި މަޖިލިސް މެމްބަރުންނަށް ވެސް ނުނިންމެނެއޭ. ރައްޔިތުންގެ ގާތަށް ދާން މި ޖެހެނީ،" ރައީސް މުއިއްޒު ވިދާޅުވި އެވެ.
ދައުރު ބަދަލުވާ ދުވަސް ނޮވެމްބަރު 11 އަށް ބަދަލުކުރަން ރައްޔިތުން ރުހޭތޯ ބައްލަވާނެ ކަމަށް ރައީސް ވިދާޅުވި އެވެ.
މީގެ އިތުރުން ރިޔާސީ އިންތިހާބުގައި އެއްބުރުން ކެންޑިޑޭޓަކު ހޮވޭ ގޮތަށް ކަންކަން ބަދަލުކުރުމަށް ރައްޔިތުންގެ ވޯޓަށް އަހާނެ ކަމަށް ރައީސް ވިދާޅުވި އެވެ.
"ދެވަނަ ބުރަކަށް ނުގޮސް، ފުރަތަމަ ބުރުގައި ޕްރިފަރެންޝަލް ވޯޓިން އިން ދެވަނަ ބުރަކަށް ދާ ހާލެއްގައި ވެރިއަކަށް ހޮވާނެ މީހާވެސް އެނގޭ ގޮތަށް ވޯޓުލެވޭ ގޮތަށް. މާނައަކީ އެއްބުރުން ނިމޭނެއޭ،" ރައީސް ވިދާޅުވި އެވެ.
ރައީސް ވިދާޅުވީ އެކަމާ ގުޅޭ ދިރާސާތައް އެޓާނީ ޖެނެރަލް އޮފީހުން ކުރަމުންދާ ކަމަށެވެ.