ބްރެޒިލުން 4.67 ކިލޯގެ މަސްތުވާތަކެއްޗާއެކު ރާއްޖެ އައި މީހަކު ކަސްޓަމްސްއިން އަތުލައިގެންފި އެވެ.
ކަސްޓަމުން ބުނީ މި މަހުގެ އެއްވަނަ ދުވަހު ވައިގެ މަގުން ރާއްޖެ އައި އުމުރުން 66 އަހަރުގެ އޮސްޓްރޭލިއާ ފިރިހެނެއްގެ އަމަލުތަކަށް ޝައްކު ވެގެން ބަލައި ފާސް ކުރުމުގެ ތެރޭގައި އޭނާގެ ލަގެޖުގެ ތެރެއިން މަސްތުވާތަކެތި ފެނިފައިވާ ކަމަށެވެ.
އަދި އެ ތަކެތި ޓެސްޓް ކުރުމުން ކޮކެއިންއަށް ޕޮޒިޓިވް ވެފައިވާ ކަމަށެވެ. އަތުލައި ގަތް މަސްތުވާތަކެތީގެ މަގުމަތީ އަގު 16.3 މިލިއަން ރުފިޔާއަށް އަރާ ކަމަށް ކަސްޓަމްސް އިން ބުންޏެވެ.
މި މައްސަލައިގައި އަތުލައިިގެން މީހާ އާއި މަސްތުވާތަކެތި މިހާރު ވަނީ ފުލުހުންނާއި ހަވާލު ކޮށްފަ އެވެ.
