2020 ވަނަ އަހަރު، ފެމިލީ ކޯޓުން ކައިވެނިކޮށް ނުދޭނެ ދުވަސްތަކާއި، ކައިވެނި ކޮށްދޭނެ ވަގުތައް ކަނޑައަޅާ އާންމުކޮށްފި އެވެ.
ކޮންމެ އަހަރެއްވެސް ނިމުމުގެ ކުރިން ކުރިއަށް އޮތް އަހަރު ކައިވެނިކޮށް ނުދޭނެ ދުވަސްތަކާއި، ކައިވެނިކޮށްދޭނެ ވަގުތައް ކަނޑައަޅާ އެ ކޯޓުން ގެންދަނީ އާންމު ކުރަމުންނެވެ.
ފެމިލީ ކޯޓުން ކޮށްފައިވާ އިއުލާނެއްގައި ބުނެފައިވަނީ އެހެން އަހަރުތަކެކޭ އެއްގޮތަށް އަންނަ އަހަރުވެސް އެއްވެސް ހޮނިހިރެއްގައި ކައިވެނިކޮށް ނުދޭނެ ކަމަށެވެ. އަދި ރަމަޟާންމަހުގެ ފުރަތަމަ ދުވަހާއި ގުޅިގެން އޭޕްރީލް 23 އަދި 24 ގައި ކައިވެނިކޮށް ނުދޭނެ ކަމަށެވެ. އަދި ފިތުރު އީދާއި ގުޅިގެން މެއި 24 ފެށިގެން 29 ވަނަ ދުވަހުގެ ނިޔަލަށްވެސް ކައިވެންޏި ކޮށްނުދޭނެ ކަމަށާ މިނިވަން ދުވަހާއި ގުޅިގެން ޖުލައި 26 އަދި 27 ގައިވެސް އެ ކޯޓްގައި ކައިވެނިކޮށް ނުދޭނެ ކަމަށެވެ. ދެން ހިމެނެނީ އަލްހާ އީދާއި ގުޅިގެން އޯގަސްޓް މަހުގެ ދެވަނަ ދުވަހާއި ތިންވަނަ ދުވަހެވެ.
2020 ގައި ކައިވެނި ކޮށްދޭނެ ވަގުތުތަކަކީ ރަސްމީ ގަޑީގައި ހެނދުނު 10:00 ފެށިގެން 11:30 އަށް އަދި މެންދުރު ފަހު 13:00 ފެށިގެން 13:30 ކަމަށެވެ. ނުރަސްމީ ގަޑީގައި 16:00 ފެށިގެން 21:00 ކަމަށެވެ.
އަދި ކޯޓުން ބޭރުގައި ކައިވެނި ކޮށްދެވޭނީ 16:00 ފެށިގެން 22:00 ކަމަށްވެސް ފެމިލީ ކޯޓުން ވަނީ ބުނެފައެވެ.
ފެމިލީ ކޯޓުން ބުނީ ކައިވެނި ކުރުމުގެ ކަންކަން ކޯޓުން މުޅިން ހަމަނުޖެހެނީސް، ވަކި ދުވަހަކަށް ކައިވެންޏަށް ތައްޔާރުވުމުގެ ގޮތުން ކުރާ ހަރަދަށް ކޯޓުން ޒިންމާނުވާނެ ކަމަށެވެ.
ކޮންމެ އަހަރަކުވެސް ރީތި ތާރީހުތަކުގައި ކައިވެނި ކުުރުމަށް ބައެއް މީހުން ބޭނުންވެއެވެ. އެގޮތުން 2020 ގައި ރީތި ތާރީހުތަކަށް ބައެއް ފަރާތްތަކުން ދަނީ ތައްޔާރުވަމުންނެވެ. ނަމަވެސް ރީތި ބައެއް ތާރީހުތައް މިފަހަރުވެސް ދިމާވަނީ ހޮނިހިރު ދުވަހާއެވެ.