ރައީސް އިބްރާހީމް މުހައްމަދު ސޯލިހު ލ. އަތޮޅުގެ ބައެއް ރަށްރަށަށް ކުރައްވާ ދަތުރުފުޅެއްގައި މިއަދު ހެނދުނު އެއަތޮޅަށް ވަޑައިގެންފި އެވެ.
އެމަނިކުފާނު ކައްދޫ އެއާޕޯޓަށް ވަޑައިގެންނެވުމުން އަތޮޅުގެ ގިނަ އަދަދެއްގެ ރައްޔިތުން އެމަނިކުފާނަށް ވަނީ ވަރަށް ހޫނު މަރުހަބާއެއް ދަންނަވައިފަ އެވެ.
ރައީސް ސޯލިހުގެ މި ދަތުރުފުޅަކީ ލ. ހިތަދޫ ސިއްހީ މަރުކަޒުގައި ހިދުމަތް ދޭންފެށިތާ 50 އަހަރު ފުރުމާއި ގުޅިގެން ބާއްވާ ހާއްސަ ޖަލްސާ ޝަރަފުވެރިކޮށްދެއްވުމަށް ކުރައްވާ ދަތުރުފުޅެއްކަމަށް ރައީސް އޮފީހުން ބުންޏެވެ.
އެމަނިކުފާނުގެ މި ދަތުރުފުޅުގައި ލ. ގަމާއި ހިތަދޫއާއި ފޮނަދޫއަށް ވަޑައިގެން އެރަށްރަށުގެ ކައުންސިލްތަކާއި، މުއައްސަސާތަކުގެ އިސްވެރިންނާ ބައްދަލުކުރެއްވުމަށް ވަނީ ހަމަޖެހިފަ އެވެ.
އަދި، އެމަނިކުފާނުގެ މި ދަތުރުފުޅުގައި ލ. އަތޮޅުގެ ބައެއް މަސްވެރިންނާ ވެސް ބައްދަލުކުރެއްވުމަށް ހަމަޖެހިފައިވާކަމަށްވެސް ރައީސް އޮފީހުން ބުނެ އެވެ.