އައު އަހަރު ފާހަގަކުރުމުގެ ގޮތުން މިރޭ 47 ރިސޯޓެއްގައި ހަވާ އަރުވާނެ ކަމަށް އެމްއެންޑީއެފުން ބުނެފި އެވެ.
އެމްއެންޑީއެފްގެ އިިސްތަރުޖަމާން މޭޖާ އިބްރާހިމް އާޒިމް މިއަދު ވިދާޅުވީ އައު އަހަރު ފާހަގަކުރުމަށް ގިނަ ރިސޯޓްތަކެއްގައި މިރޭ ހަވާ އަރުވާނެ ކަމަށެވެ. އެގޮތުން 47 ރިސޯޓެއްގައި ހަވާ އެރުވުމަށް ހަމަޖެހިފައިވާ ކަމަށް އާޒިމް ވިދާޅުވިއެވެ.
ރާއްޖޭގެ އެއްވެސް ސަރަހައްދެއްގައި ހަވާ އެރުވޭނީ ސިފައިން މެދުވެރިކޮށެވެ. އެގޮތުން ސިފައިންގެ ކުންފުނި ސިފްކޯ މެދުވެރިކޮށް އެކި ރަސްމިއްޔާތު ތަކުގައި ރާއްޖޭގައި ދަނީ ހަވާ އަރުވަމުންނެވެ.
އާޒިމް ވިދާޅުވީ އައު އަހަރު ފާހަގަކުރުމަށް ގިނަ ރިސޯޓްތަކެއްގައި ހަވާ އެރުވި ނަމަވެސް މާލޭގައި ހަވާ އަރުވާ ގޮތަށް ހަމަޖެހިފައިނުވާ ަކަމަށެވެ.
މާލޭގައި ހަވާ ނޭރުވިނަމަވެސް އާ އަހަރު ފާހަގަ ކުރަން ކާނިވާ ސަރަހައްދުގައި ބޮޑު ޝޯއެއް ބާއްވަން ވަނީ ނިންމާފައެވެ.
ޓޫރިޒަމް މިނިސްޓްރީން ބުނީ ލޭޒާ ލައިޓުތަކާއެކު ކާނިވާ ސްޓޭޖުގައި އާ އަހަރު ފާހަގަ ކުރަން ޝޯއެއް ބާއްވަން ނިންމާފައިވާ ކަމަށާއި އެ ޝޯ ފަށާނީ މިރޭ 8:30 ގައި ކަމަށެވެ. އަދި އެ ޝޯގައި ރާއްޖޭގެ މަޝްހޫރު ފަންނާނުން ބައިވެރިވާނެ ކަމަށް ޓޫރިޒަމް މިނިސްޓްރީން ބުންޏެވެ.
އެގޮތުން ލަވަކިޔުންތެރިޔާ ޝަލަބީއާ، ޒާރާ މުޖްތަބާ އަދި މުހައްމަދު ޝިއުޒް ބައިވެރިވާނެ ކަމަށް ޓޫރިޒަމް މިނިސްޓްރީން ބުންނެވެ. އޭގެ އިތުރުން "ނަބާ" ބޮޑު ބެރު ގްރޫޕުގެ ހަރަކާތްތައް ވެސް ފެންނާނެ ކަމަށް އެ މިނިސްޓްރީން ބުންޏެވެ.
އާ އަހަރުގެ ޝޯ ބާއްވަން ނިންމާފައިވާ އިރު ބައެއް ދީނީ އިލްމުވެރިން ވަނީ އާ އަހަރު ފާހަގަ ނުކުރަން ސަރުކާރަށް ގޮވާލައިފަ އެވެ.