އެތަންސް (އެސޯސިއޭޓެޑް ޕްރެސް) -- މާލީ އަނދަވަޅަކަށް ވެއްޓިފައިވާ ގްރީސް އިން އެގައުމުގެ ތާރީހުގައި ފުރަތަމަފަހަރަށް އަންހެން ބޮޑުވަޒީރަކު ހޮވައިފި އެވެ. އެގައުމުގެ ސުޕްރީމް ކޯޓުގެ ޖަޖު ވަސިލީކީ ތަނޯއޫ ބޮޑުވަޒީރު ކަމަށް އިއްޔެ އައްޔަން ކޮއްފައިމިވަނީ ކުރީގެ ބޮޑުވަޒީރު އެލެކްސިސް ސިޕްރާސް އިސްތިއުފާ ދިނުމާއި ގުޅިގެން އަންނަމަހު ބޭއްވުމަށް ހަމަޖެހިފައިވާ އިންތިހާބުން ބޮޑުވަޒީރަކު އިންތިހާބު ކުރެވެންދެނެވެ.
ބޮޑުވަޒީރު ކަމުގައި ހުންނަވާނީ ކުޑަ ދުވަސް ކޮޅަކަށް ކަމުގައިވިއަސް ގްރީސްއަށް ކުރިމަތިވެފައިވާ ބޮޑެތި މާލީ މައްސަލަތަކާއި ރެފިއުޖީންގެ މައްސަލަތައް އަތް ނުފޯރާ ހިސާބަށް ގޮސްފައިވާ މި ދަނޑިވަޅުގައި، ތަނޯއޫ އަށް ބޮޑެތި ނިންމުންތައް ނިންމަން ޖެހޭނެ ކަމަށް ބެލެވެއެވެ. އެތައް ސަތޭކަ ބިލިއަން ޑޮލަރުން ދަރަނިވެރިވެފައިވާ ގްރީސްއަށް މި އަހަރު އެކަނި ވެސް ދޮޅު ލައްކަ އަށް ވުރެ ގިނަ ރެފިއުޖީން އެތެރެވެފައިވެއެވެ.
ކުރީގެ ބޮޑުވަޒީރު މިދިޔަ ހަފްތާގައި އިސްތިއުފާ ދޭން ޖެހުނީ ގައުމަށް ބޮޑެތި މައްސަލަތައް ކުރިމަތިވެ އެބޭފުޅާގެ އަމިއްލަ ޕާޓީން ފިއްތުންތައް ކުރިމަތި ވެގެންނެވެ. 2010 ވަނަ އަހަރުން ފެށިގެން ގްރީސް ބަރޯސާ ވެފައިވަނީ ޔޫރަޕްގެ އެހެނިހެން ގައުމުތަކާއި އިންޓަރނޭޝަނަލް މަނިޓަރީ ފަންޑުގެ އެހީއަށެވެ. މިގޮތުން އެކި ފަރާތްތަކުން ގްރީސްގެ ދަރަނި ފޫބެއްދުމަށް 270 ބިލިއަން ޑޮލަރުގެ ލޯނު ދީފައިވެއެވެ.
ބޮޑުވަޒީރު ތަނޯއޫ މިއަދު އެކަމަނާގެ ކެބިނެޓް އިއުލާނު ކުރައްވާނެއެވެ. އަދި އިންތިހާބު ބާއްވާނެ ތާރީހެއް ވެސް އިއުލާނު ކުރައްވާނެއެވެ.