ޕާންޑޯފް (ރޮއިޓާރސް) -- އޮސްޓްރިއާއަށް އެތެރެވި ފަންސާހެއްހާ ރެފިއުޖީން، ދަތުރުކުރި ލޮރީގައި މަރުވެފައި ތިއްބާ އިއްޔެ ފެނުމާއެކު ޔޫރަޕަށް އެތެރެވާ ރެފިއުޖީންގެ މައްސަލަ ސީރިއަސް ވެއްޖެ އެވެ. އޮސްޓްރިއާގެ ހައިވޭއެއް މައްޗަށް ދޫކޮއްލާފައި އޮތް މި ލޮރީ ދުއްވަން ތިބި މީހުން ފިލާފައިވާއިރު، މި ލޮރީ ފުލުހުންނަށް ފެނުނުއިރު އޭގައި ތިބި މީހުން މަރުވެފައިވާތާ ދެތިން ދުވަސް ވެދާނެ ކަމަށް ބެލެވެ އެވެ.
އެތައް ސަތޭކަ ރެފިއުޖީންނަކާއި އެކު ލީބިއާ އިން ފުރައިގެން ޔޫރަޕަށް ފަތުރުކުރި ބޯޓެއް ވެސް އިއްޔެ ވަނީ ބަންޑުންޖަހާލާފައެވެ. އެމީހުން ސަލާމަތް ކުރުމުގެ މަސައްކަތް ކުރިއަށް ދާއިރު އެ ބޯޓުގައި އަވައްޓެރި ބަންގްލަދޭޝް އާއި ޕާކިސްތާން މީހުންގެ އިތުރުން މޮރޮކޯ އަދި ސީރިޔާގެ ރައްޔިތުން ތިއްބެވެ. ބުދަ ދުވަހު ވެސް ލީބިޔާ ކައިރިން ހާލުގައި ޖެހިފައިވާ ތިންހާހެއްހާ ރެފިއުޖީން ސަލާމަތް ކޮއްފައިވާއިރު އިޓަލީގެ ކޯސްޓްގާޑުން އެ ދުވަހު އެ ސަރަހައްދުން ހޯދި ބޯޓެއްގައި ފަންސާހެއްހާ ރެފިއުޖީން މަރުވެފައި ތައްބާ ފެނިފައިވެ އެވެ. ފާއިތުވި ދެދުވަހުގެ ހާދިސާތަކުގެ ކުރިން، މައިގްރޭޝަންއާއި ބެހޭ ބައިނަލްއަގްވާމީ ޖަމިއްޔާއިން ލަފާކޮއްފައިވާ ގޮތުގައި ކަނޑުމަގުން ޔޫރަޕަށް އެތެރެވާން އުޅުމުގެ ތެރޭގައި މި އަހަރު އެކަނި ވެސް ދެހާހަށް ވުރެ ގިނަ ރެފިއުޖީން ވަނީ މަރުވެފަ އެވެ.
ހަނގުރާމައިގާ ސުންނާފަތި ވަމުންދާ ސީރިޔާ އާއި ލީބިޔާ ފަދަ ގައުމުތަކުން އެތައް ހާސް ބަޔަކު ޔޫރަޕަށް އެތެރެވުމަށް މަސައްކަތް ކުރަމުންދާއިރު ޔޫރަޕްގެ ގައުމުތައް ގުޅިގެން ރެފިއުޖީންގެ މައްސަލަ ހައްލުކުރުމަށް ތެދުވުމަށް ޖަރުމަނުގެ ޗާންސެލަރ އެންޖެލާ މެރްކެލް ވަނީ ގޮވާލައްވާފަ އެވެ. ހިމާޔަތް ހޯދުމަށް، އަށް ލައްކަ އެއްހާ މީހުން މި އަހަރުގެ ތެރޭގައި ޖަރުމަނުގެ ކިބައިން އެދޭނެ ކަމަށް އެގައުމުން ލަފާކުރެ އެވެ.