އެމެރިކާއިން އިސްނަގައިގެން އީރަނާއެކު ހަދާފައިވާ މި އެއްބަސްވުމާއިގެން ކުރިއަށް ދިއުމަށް ކޮންގްރެސްގެ ތާއީދު ރައީސް އޮބާމާއަށް ބޭނުންވާނެއެވެ. ކޮންގްރެސްގައި މިހާރު ދަނީ މި މައްސަލައާއި މެދު ބަހުސް ކުރަމުންނެވެ.
އިއްޔެ އާންމު ކުރި ލިޔުމެއްގައި ސަމަންތާ ޕަވަރ ވިދާޅުވީ، މި މައްސަލައާއި މެދު އެމެރިކާގެ ކޮންގްރެސް ގައި ކުރެވެމުންދާ ބަހުސް އ.ދ ގެ 193 ގައުމުގެ ޑިޕްލޮމެޓުން ބަލަމުން ދަނީ މިދިޔަ އަހަރު ދުނިޔޭގެ ފުޓުބޯޅަ މުބާރާތް ބެލި ގޮތަށް ސަމާލުކަމާއި އެކު ކަމަށެވެ. އަދި ކޮންގްރެސް އިން މި އެއްބަސް ވުމާ ދެކޮޅު ހަދައިފި ނަމަ، ދުނިޔޭގެ އެކި ގައުމު ތަކާއެކު ކޯލިޝަން ހަދައިގެން އެމެރިކާއިން ހާސިލު ކުރަން ކަނޑައަޅާފައިވާ ލަނޑުދަނޑިތައް ހާސިލް ކުރަން ހުރަސްއެޅިގެންދާނެ ކަމަށް ވެސް ޕަވަރ ވިދާޅުވިއެވެ. އަދި މި އެއްބަސްވުން ބޮލާލައި ޖަހައިފިނަމަ، އީރަނާއި އެކު އިތުރު ހާރިޖީ ދޮރެއް ނުހުޅުވޭނެ ކަމަށްވެސް އެކަމަނާ ވިދާޅުވިއެވެ.
މިދިޔަ މަހު އެމެރިކާއާއި ބާރުގަދަ ގައުމުތަކެއް ގުޅިގެން އީރާނާއެކު ހަދާފައިވާ ޑީލަށް ކޮންގްރެސްގެ ތާއީދު ހޯދުމަށް ވައިޓް ހައުސް ބިޒީވެފައިވާއިރު، އިދިކޮޅު ރިޕަބްލިކަން ޕާޓީގެ ގިނަ މެންބަރުން މި އެއްބަސްވުމާއި ދެކޮޅެވެ. އެ ފަރާތްތަކުން ބުނަނީ، މި އެއްބަސްވުން އީރާނުގެ ކޮޅަށް ބުރަވެފައި ވާ ކަމަށާއި، އީރާނަށް މާބޮޑަށް ދޫ ދީފައި ވާ ކަމަށެވެ. މި އެއްބަސް ވުމަށް އެމެރިކާގެ ކޮންގްރެސް އިން ވޯޓު ދިނުން އޮންނާނީ އަންނަ މަހު ކަމަށް ބެލެވެއެވެ. މި އެއްބަސްވުމަށް ތާއީދު ލިބި ތަންފީޒު ކުރެވިއްޖެ ނަމަ، އީރާނާ ދެކޮޅަށް އަޅާފައިވާ ދަތިކުރުމުގެ ގިނަ ފިޔަވަޅުތައް އުވާލެވޭނެއެވެ.