ހޮނހިރު ދުވަހު ބާއްވާ އެފްއޭއެމް ކޮންގްރެސްގައި ތިން ވަނަ ޑިވިޝަނާއި ދެ ވަނަ ޑިވިޝަނުން ވޯޓުލާނެ ކްލަބުތައް ފައިނަލްކޮށްފި އެވެ.
އެފްއޭއެމުގައި ކޮންމެ ޑިވިޝަނެއްގެ ކުލަބުތައް ވަކިން ވޯޓުލައިގެން ތިން ވަނަ ޑިވިޝަނުން ވޯޓުދޭނީ އެލްޓީ ސްޕޯޓްސް އާއި ރެޑްލައިނެވެ. ދެ ވަނަ ޑިވިޝަނުން ވޯޓުދޭނީ ޒެފްރޯލް، މެކާނޯ އަދި ޔުނައިޓެޑް ވިކްޓަރީ އެވެ.
މިރޭގެ ޕްރައިމަރީގައި ލިޔެކިއުންތައް ހަމަކޮށްފައިނުވާތީވެ ދެ ވަނަ ޑިވިޝަނުގެ ހަ ކުލަބުގެ ތެރެއިން ވިޔަންސާ އާއި އޭވައިއެލް އަށް ވޯޓުލުމުގެ ފުރުސަތު ނުލިބުނެވެ. ދެ ވަނަ ޑިވިޝަނުން ވޯޓުލާން ފުރުސަތު ލިބުނު އަނެއް ކުލަބަކީ ޖޭޖޭ ސްޕޯޓްސް އެވެ.
ތިން ވަނަ ޑިވިޝަނުގެ ފަސް ކުލަބުގެ ތެރެއިން ކޮންގްރެންސްގައި ވޯޓުލާން ފުރުސަތު ނުލިބުނީ ގާމަގާއި މުއިވެޔޮ އަދި އޮފްއެފްސީ އެވެ.
މި ކޮންގްރެސްގައި އޮންނާނީ އެފްއޭއެމުގެ އާ އަސާސީ ގަވާއިދު ފާސްކުރުމެވެ. މިހާރުގެ އަސާސީ ގަވާއިދުގައިވާ ގޮތުން ކޮންގްރެސްގައި ވޯޓުލާނީ ޖުމުލަ 13 ކުލަބަކުންނެވެ. އެއީ ފުރަތަމަ ޑިވިޝަނުގެ އަށް ކުލަބާއި ދެ ވަނަ ޑިވިޝަނުގެ ތިން ކުލަބާއި ތިން ވަނަ ޑިވިޝަނުގެ ދެ ކުލަބުންނެވެ.
އެފްއޭއެމުގެ ރައީސް ކަމުން އިލްހާމު އަހުމަދު ފީފާއިން ވަކިކުރި ހިސާބުން އެ އިދާރާ ހިންގަމުން އަންނަނީ ފީފާއިން އެކުލަވާލާފައިވާ ފަސް މެމްބަރުންގެ ނޯމަލައިޒޭޝަން ކޮމިޓީއަކުންނެވެ.