މިނިވަން50 ޗެމްޕިއަންޝިޕް ފުޓްބޯޅަ މުބާރާތުގައި މި ހަފުތާ ބަންދުގައި ކުޅުމަށް ހަމަޖެހިފައިވާ މެޗުތައް ހުވަދު އަތޮޅަށް ކުރަމުންދާ ވިއްސާރައިގެ ސަބަބުން ފަސްކޮށްފި އެވެ.
މި ގޮތުން ފަސްކުރީ ގއ. ކޮނޑޭ އާއި އެއަތޮޅު ގެނަމަފުށި ބައްދަލުކުރަން ހަމަޖެހިފައި އޮތް މެޗާއި ގއ. ވިލިނގިއްޔާއި މާމެންދޫ ބައްދަލުކުރާ މެޗާއި ގދ. އަތޮޅު މުބާރާތުގައި ތިނަދޫ އާއި ގައްދޫ ބައްދަލުކުރަންޖެހޭ މެޗާއި ފަރެސްމާތޮޑާ އާއި ހޯނޑެއްދޫ ބައްދަލުކުރާ މެޗެވެ.
އެފްއޭއެމުން މިހާރު ނިންމާފައިވަނީ މި މެޗުތައް މި މަހުގެ 7 އަދި 8 ވަނަ ދުވަހު ކުޅޭގޮތަށެވެ.
މިނިވަން50 މުބާރާތް މުޅި ރާއްޖޭގައި ކުޅެމުންދާއިރު ގދ. އަތޮޅު މުބާރާތް ވަނީ ވަރަށް ފޯރިގަދަވެފަ އެވެ. މިދިޔަ ހަފުތާގައި ހޯނޑެއްދޫ އާއި ތިނަދޫ ކުޅުނު މެޗުގައި ހިނގި ހަމަނުޖެހުންތަކާ ގުޅިގެން ތިނަދޫ ވަނީ 25000ރ. އިން ޖޫރިމަނާކޮށްފަ އެވެ. އަދި ކޯޗު މުޅި މުބާރާތަށް ސަސްޕެންޑްކޮށް 15000ރ. އިން ވަނީ ޖޫރިމަނާކޮށްފަ އެވެ. އަދި ހޯނޑެއްދޫގެ ފޯވަޑް އާދަމް ލަރީފް (ރޮނާލްޑޯ) އާއި އެ ޓީމު ވެސް ވަނީ ޖޫރިމަނާކޮށްފަ އެވެ.
ސަޕޯޓަރުންނާއި ބެންޗުން ވެސް ދަނޑަށް އަރައި ހިންގި ހަމަނުޖެހުންތަކާ ގުޅިގެން މި ދެ ރަށަށް އެފްއޭއެމުން ވަނީ މިފަދަ އަމަލެއް ތަކުރާރުވެއްޖެނަމަ މުބާރާތުން އެ ދެ ރަށް ވަކިކުރާނެ ކަމުގެ އިންޒާރުދީފަ އެވެ.