މިނިވަން50 ޗެމްޕިއަންޝިޕް ފުޓްބޯޅަ މުބާރާތުގައި ހަމަނުޖެހުން ހިނގައި މެޗު ހުއްޓާލަންޖެހުމުގައި ތިނަދޫގެ އިހުމާލުއޮތްކަމަށް ބަލައި އެ މެޗު 3-0 އިން ހޯނޑެއްދު އަށް ދިން މައްސަލަ ތިނަދޫ ޓީމުން އިސްތިއުނާފުކޮށްފި އެވެ.
މިދިޔަ ހަފުތާގެ ހޮނިހިރު ދުވަހު ހޯނޑެއްދޫގައި ކުޅުނު މެޗުން ހޯނޑެއްދޫ މޮޅުވި ކަމަށް އެފްއޭއެމުން ނިންމީ އެ މެޗު ނިމެން ސިކުންތުކޮޅަކަށް ވެފައިވަނިކޮށް ހޯނޑެއްދޫގެ ފޯވަޑް އާދަމް ލަރީފް (ރޮނާލްޑޯ) ކުރި ފައުލަކާ ގުޅިގެން ތިނަދޫގެ ސަޕޯޓަރުންނާއި ތިނަދޫ ޓީމުގެ ބެންޗުން ދަނޑަށް އެރުމުން މެޗު ކުރިއަށް ނުގެންދެވުމުންނެވެ. އެއިރު 2-1 އިން ކުރީގައި އޮތީ ތިނަދޫ އެވެ.
ތިނަދޫން މައްސަލަ އިސްތިއުނާފު ކުރީ މެޗު ނިމުނު ކަމަށް ރެފްރީ ކަށިގަނޑު ފުމުނުކަމަށްބުނެ އެވެ.
ނަމަވެސް މެޗު ކޮމިޝަނަރާއި ރެފްރީގެ ރިޕޯޓަށް ބަލައިގެން އެފްއޭއެމުގެ ޑިސިޕްލިނަރީ ކޮމިޓީން ތިނަދޫ މެޗުން ބަލިވިކަމަށް ނިންމައި 25000ރ. އިން ޖޫރިމަނާކޮށް ވަނީ މީގެ ފަހުން މިފަދަ އެއްވެސް ހަމަނުޖެހުމެއް ހިންގައިފިނަމަ މުބާރާތުން ވަކިކުރާނެ ކަމަށް އިންޒާރުދީފަ އެވެ.
މި މެޗުގައި ހިނގި ހަމަނުޖެހުންތަކާ ގުޅިގެން ތިނަދޫގެ ކޯޗު އިބްރާހީމް ޝާހު ވަނީ މުޅި މުބާރާތުން ސަސްޕެންޑްކޮށްފަ އެވެ. އަދި އޭނާ 15000ރ. އިން ޖޫރިމަނާވެސްކޮށްފައިވެ އެވެ. މީގެ އިތުރުން ރޮނާލްޑޯ ވެސް ވަނީ ފަސް މެޗަށް ސަސްޕެންޑްކޮށް 5000ރ. ޖޫރިމަނާކޮށްފަ އެވެ.
މި މުބާރާތުގައި ހޯމަ ދުވަހު ކުޅޭނީ ފަރެސްމާތޮޑާގައި އެރަށާއި ހޯނޑެއްދޫ އެވެ. ހޮނިހިރު ދުވަހު އަމިއްލަ ރަށުގައި ތިނަދޫ ބައްދަލުކުރާނީ ގައްދޫއާ އެވެ.