އެފްއޭއެމުގެ ރައީސަކު ހޮވަން ބާއްވާ އިންތިހާބަށް އިލެކްޓޯރަލް ކޮމިޓީ އެކުލަވާލައިފި އެވެ.
ނޯމަލައިޒޭޝަން ކޮމިޓީން އިއްޔެ އެފްއޭއެމުގެ އަސާސީ ގަވާއިދު ފާސްކުރަން ބޭއްވި ކޮންގްރެސްގައި އެކުލަވާލި ކޮމިޓީގައި ތިއްބަވަނީ ތިން މެމްބަރުންނެވެ.
އެއީ ޖޫޑިޝަލް އެޑްމިނިސްޓްރޭޝަނުގެ ޗެއާމަން ހަސަން ސައީދު ހުސައިން އާއި މިނިސްޓްރީ އޮފް ހައުސިންގެ ސްޓޭޓް މިނިސްޓަރު މުހައްމަދު ފާއިޒާއި ސްޕްރިންޑެންޓް އޮފް ޕޮލިސް މުހައްމަދު ދާއޫދު އެވެ. މި ކޮމިޓީގެ ޗެއާމަނަކީ ހަސަން ސައީދެވެ.
އިންތިހާބުގައި ދިމާވާ ކަންކަން ބެލުމަށް އެކުލަވާލި އެޕީލް ކޮމިޓީގައި ވެސް ތިއްބަވަނީ ތިން މެމްބަރުންނެވެ. އެއީ ޑެޕިއުޓީ އޮފް ސްޕްރިންޑެންޓް އޮފް ކަސްޓަމްސްގެ ފަރާތުން އަބުދުﷲ އަލީ އާއި ރައީސް އޮފީހުގެ ޑިރެކްޓަރ މުހައްމަދު ލުވެއިޒް އާއި ގާނޫނީ ވަކީލު އައިސަތު ހައިފާ ރަހީމެވެ. މި ކޮމިޓީގެ ޗެއާމަނަކީ އަބުދުﷲ އަލީ އެވެ.
އާ އަސާސީ ގަވާއިދު އިއްޔެ ފާސްކޮށް 44 ކުލަބަށް ވޯޓުދެވޭގޮތަށް ވަނީ ހަމަޖައްސާފަ އެވެ. އެފްއޭއެމުން މިހާރު ދަނީ އިންތިހާބަށް ކުރިމަތިލާން ބޭނުންވާ ފަރާތްތަކަށް ފުރުސަތު ހުޅުވާލުމަށް ތައްޔާރުވަމުންނެވެ.