އެފްއޭއެމުގެ ރައީސަކު ހޮވަން އަންނަ އޮކްޓޫބަރު މަހުގެ 22 ވަނަ ދުވަހު އިންތިހާބު ބާއްވަން އެ އިދާރާއިން ނިންމައިފި އެވެ.
އިއްޔެ ބޭއްވި އެފްއޭއެމުގެ ކޮންގްރެސްއިން ފާސްކުރި އާ އަސާސީ ގަވާއިދުގެ ދަށުން ބާއްވާ އިންތިހާބަށް ކުރިމަތިލުމުގެ މުއްދަތު ހަމަވާނީ މިމަހުގެ 16 ވަނަ ދުވަހަށެވެ.
އިންތިހާބުގައި ވާދަކުރަން ޖެހޭނީ ޓީމެއްގެ ގޮތުގަ އެވެ. ވަކިވަކި ފަރުދުންނަށް ފުުރުސަތު ނެތްއިރު އިންތިހާބުގައި ވާދަކުރުމަށް ވޯޓުލެވޭ 44 ކުލަބުގެ ތެރެއިން ފަސް ކުލަބުގެ ވޯޓު ހޯދަންޖެހޭނެ އެވެ. މީގެ ތެރެއިން ތިން ކުލަބަކީ ފުރަތަމަ ޑިވިޝަނުގެ ކުލަބުތަކަށްވާންޖެހޭނެ އެވެ.
ކުރީގެ ރައީސް އިލްހާމު އަހުމަދުގެ ދައުރު ނުނިމެނީސް އޭނާ މަގާމުން ދުރުކޮށް އެފްއޭއެމުން ހިންގުމަށް ފީފާއިން އެކުލަވާލި ފަސް މެމްބަރުންގެ ނޯމަލައިޒޭޝަން ކޮމިޓީގެ މެމްބަރުންނަށް ވެސް އިންތިހާބުގައި ވާދަކުރުމުގެ ފުރުސަތު އެބައޮތެވެ. އެފްއޭއެމުން ވަނީ އިންތިހާބީ ކޮމިޓީ އާއި އިންތިހާބީ ކަންކަމާގުޅޭ އެޕީލް ކޮމިޓީން ވެސް މިއަދު އެކުލަވާލާފަ އެވެ.
އެފްއޭއެމުގެ އިންތިހާބުގައި ކުރިން ވޯޓުލެވެނީ 13 ކުލަބަކަށެވެ. ނަމަވެސް އާ އަސާސީ ގަވާއިދުގެ ދަށުން 44 ކުލަބަށާއި އެފްއޭއެމުން އުފައްދާ ރެފްރީޒް އެސޯސިއޭޝަން ފަދަ އިދާރާތަކަށް ވެސް ވޯޓުލެވޭނެ އެވެ.