ވޯލްޑް ކަޕު ކޮލިފައިންގައި މިއަދު ޗައިނާއާ ދެކޮޅަށް ކުޅޭ މެޗު ފެށިގެން ނިމެންދެން އަބަދު ޑިފެންސް ނުކުރާނެ ކަމަށް އެސިސްޓެންޓް ކޯޗު އިސްމާއީލް މަހުފޫޒް (އިންމަ) ބުނެފި އެވެ.
ގައުމީ ކެޕްޓަން އަލީ އަޝްފާގް (ދަގަނޑޭ) މެޗު ނުކުޅެން ނިންމައި ޓީމާއެކު ނުގޮސް މާލޭގައި ހުރިއިރު އިންމަ ބުނީ މެޗުން ރަނގަޅު ނަތީޖާއެއް ނެރެވޭނެ ކަމަށް އޭނާ ގަބޫލުކުރާ ކަމަށެވެ.
"އަހަރެން ގަބޫލުކުރާ ގޮތުގައި އަހަރުމެންނަށް ޗައިނާއާ ދެކޮޅަށް ރަނގަޅު ނަތީޖާއެއް ނެރެން ފުރުސަތު އެބައޮތް. އަހަރުމެން އަބަދު ޑިފެންސް ކުރާކަށް ގަސްތުނުކުރާނަން. އަހަރުމެންގެ އަމާޒަކީ ޗައިނާ ހުއްޓުވައި ފުރަތަމަ ހާފުގައި ރަނގަޅު ނަތީޖާއެއް ހޯދުން. އެއިރުން ކޮންމެވެސް ގޮތެއް (ރަނގަޅު ނަތީޖާއެއް) ހޯދިދާނެ،" ގައުމީ ޓީމުގެ ކުރީގެ މިޑްފީލްޑަރު ބުންޏެވެ.
ކުލަބު ލެވެލްގައި ގިނަ ދުވަސްތަކެއް ވަންދެން މާޒިޔާ އަށް ކޯޗުކޮށްދީ ކާމިޔާބު ހޯދައިދިން އިންމަ ބުނީ އަމިއްލަ ދަނޑުގައި ކުޅޭތީވެ ޗައިނާއަށް އެޑްވާންޓޭޖްތަކެއް ހުންނާނެ ކަމަށެވެ.
"އަހަރުމެން 90 މިނިޓްގައި ޑިފެންސިވް ގޭމެއް ނުކުޅޭނަން. ދެން އާއްމުކޮށް ރަނގަޅު ޓީމެއް، ބަލި ޓީމަކާ ކުޅޭއިރު ހާއްސަކޮށް އަމިއްލަ ދަނޑުގައި 35000 މީހުންގެ ކުރިމަތީގައި ކުޅޭއިރު އެޑްވާންޓޭޖްތަކެއް ހުންނާނެ،" އިންމަ ބުންޏެވެ.
މި މެޗަށް ގައުމީ ޓީމާ ހަވާލުވާނީ ނިއުޒީލޭންޑް ވޯލްޑް ކަޕަށް ކޮލިފައިކޮށްދިން ކޯޗު ރިކލީ ހާބަޓެވެ. އޭނާ މިވަގުތު ހުރީ އެފްއޭއެމުގެ އޮފިޝަލުންނާއެކު ޗައިނާގަ އެވެ.
ރާއްޖެ އާއި ޗައިނާ މެޗު ފަށާނީ މިއަދު ހަވީރު 4:35ގަ އެވެ.