ވޯލްޑް ކަޕް ކޮލިފައިންގައި ޗައިނާއާ ދެކޮޅަށް ރާއްޖެ މިއަދު ކުޅޭ މެޗަށް ޓީމުގައި ތިބި ޒުވާން ކުޅުންތެރިން ތިބީ ވަރަށް ބޮޑަށް ތައްޔާރުވެގެން ކަމަށް ވައިސް ކެޕްޓަން މުހައްމަދު އާރިފް (ބަކާ) ބުނެފި އެވެ.
ގައުމީ ކެޕްޓަން އަލީ އަޝްފާގް (ދަގަނޑޭ) މި މެޗު ނުކުޅެން ނިންމައި ޓީމާއެކު ނުގޮސް މާލެގައި މަޑުކުރުމުން ޗައިނާއާ ދެކޮޅަށް ކެޕްޓަން ކުރާނެ ބަކާ ބުނީ ޖުމުލަކޮށް މުޅި ޓީމު ވެސް މެޗަށް ތައްޔާރު ކަމަށެވެ.
"ޖުމުލަކޮށް ހުރިހާ ކުޅުންތެރިން ވެސް ތިބީ ހުރިހާ ގޮތަކުން ވެސް ޗައިނާ މެޗަށް ތައްޔާރުވެގެން. ހާއްސަކޮށް ޒުވާން ކުޅުންތެރިން،" ބަކާ ބުންޏެވެ.
އިތުރަށް އޭނާ ބުނެފައިވަނީ ކުޅުންތެރިން ތިބީ ގައުމީ ޓީމަށް އަލަށް ހަމަޖެއްސި ކޯޗު ނިއުޒީލޭންޑްގެ ރިކީ ހާބަޓަށް ފެންވަރު ސާބިތުކޮށްދޭން ތައްޔާރަށް ކަމަށެވެ.
"މިއީ އަހަރުމެންނަށް ލިބޭ ފުރަތަމަ ފުރުސަތު އަހަރުމެންގެ ކޯޗަށް ފެންވަރު ސާބިތުކޮށްދޭން. އެހެންވީމަ އަހަރުމެން އެންމެން ތިބީ މެޗަށް ތައްޔާރުވެގެން،" މިޔަންމާގެ ކޭބީޒެޑަށް ކުޅެމުން އަންނަ ބަކާ ބުންޏެވެ.
މިއަދު ހަވީރު 4:35 ގައި ފަށާ މެޗުގައި ރާއްޖޭގެ ޓީމަށް ކޯޗުކޮށްދޭނީ އެސިސްޓެންޓް ކޯޗު އިސްމާއީލް މަހުފޫޒް (އިންމަ) އެވެ. ނަމަވެސް މެޗަށް ފަހު ޓީމާ ހަވާލުވުމަށް ކޯޗު ހާބަޓް މިހާރު ހުރީ ޗައިނާއަށްގޮހެވެ. އޭނާ އަކީ 2010 ވަނަ އަހަރު ނިއުޒީލޭންޑަށް ވޯލްޑް ކަޕުގައި ކޯޗުކޮށްދިން ކޯޗެވެ.
ވޯލްޑް ކަޕް ކޮލިފައިންގައި ރާއްޖެ މިހާތަނަށް ކުޅުނު ދެ މެޗުން ވެސް ވަނީ ބަލިވެފަ އެވެ. އެއީ ގަތަރު އަތުން 1-0 އިން އަދި ހޮންކޮން އަތުން 2-0 އިންނެވެ.