ވޯލްޑް ކަޕް ކޮލިފައިންގައި ވަރުގަދަ ޗައިނާއާ ވާދަކޮށް 3-0 އިން ރާއްޖެ ދެންމެ ބަލިވެއްޖެ އެވެ.
ރާއްޖެ ގަޑިން ހަވީރު 4:30 ގައި ޗައިނާގެ ޝެންޔެންގް އޮލިމްޕިކް ސްޕޯޓްސް ސެންޓަރުގެ ދަނޑުގައި ކުޅުނު މެޗުގައި ރާއްޖެއިން ފުރަތަމަ ހާފުގައި ރަނގަޅު ކުޅުމެއް ދެއްކި އެވެ.
ނަމަވެސް ޗައިނާއިން ފުރަތަމަ ލަނޑު ހަތަރު ވަނަ މިނިޓްގައި ޖެހީ ކުޅުންތެރިން ރަނގަޅަށް ހަމައަކަށް ނޭޅެނީސް ކީޕަރު މުހައްމަދު އިމްރާނަށް ހެދުނު ގޯހަކުންނެވެ. އޭރިޔާތެރެއަށް މަތިން އައި ބޯޅަ އަށް އަމްދާން އަލީ އާއި ކީޕަރު އިމްރާނު ވެސް ބޯޅަ އަށް އެރި ވަގުތު ދެ ކުޅުންތެރިންނަށް ވެސް ބޯޅަ ގެއްލި ޗައިނާގެ ޑަބާޔޫ ހުސްކޮށް ހުރެ ގޯލަށް ޖެހި ބޯޅަ ވަނީ ހުރަސްދަނޑީގައި ވެސް ޖެހިލާފަ އެވެ. ނަމަވެސް މީގެ ފަހުން އިމްރާން ވަނީ ނުރައްކާތެރި ގިނަ ބޯޅަތަކެއް ސަލާމަތްކޮށްފަ އެވެ.
ކެޕްޓަން އަލީ އަޝްފާގް (ދަގަނޑޭ) މެޗު ނުކުޅެން ނިންމައި މާލޭގައި މަޑުކުރުމުން އޭނާ ނެތި ކުޅުނު މެޗުގައި ރާއްޖެ އަށް ފަހު ހާފުގައި ގިނަ ގޯސްތަކެއް ހެދުނެވެ. ހާއްސަކޮށް ރަނގަޅަށް މާކް ނުކުރެވުން ފަދަ ކަންތައްތައް ރާއްޖެ އަށް ކުރިމަތިވި އެވެ. އަނިޔާގެ ސަބަބުން ތަޖުރިބާކާރު ކީޕަރު އިމްރާން މުހައްމަދާއި މިޑްފީލްޑަރު މުހައްމަދު އުމޭރު ވެސް ނުލައި ކޯޗު އިސްމާއީލް މަހުފޫޒް (އިންމަ) މި މެޗަށް ނެރުނު ޒުވާން ޓީމަށް ލަނޑު ޖަހަން އެންމެ ހުސް ފުރުސަތެއް ލިބުނީ ފަހު ހާފު ފަށައިގެން 55 ވަނަ މިނިޓްގަ އެވެ. އަހުމަދު ނާޝިދު އަރިމަތިން ވަރަށް ހުސްކޮށް ކުރިއަށް އަރައި ފޮނުވާލި ބޯޅަ ދިޔައީ ގޯލު ހުރަސްކޮށް އަރިމަތީ ދަނޑިކައިރިން ބޭރަށެވެ.
ޗައިނާގެ ދެ ވަނަ ލަނޑާއި ތިން ވަނަ ލަނޑަކީ ރާއްޖެ އަށް ރަނގަޅަށް ކުޅުންތެރިން މާކް ނުކުރެވުމުން ޖެހި ދެ ގޯލެވެ. ދެ ވަނަ ލަނޑު ޖެހީ 58 ވަނަ މިނިޓްގައި އަނެއްކާ ވެސް ޑަބާޔޫ އެވެ. ތިން ވަނަ ލަނޑު 66 ވަނަ މިނިޓްގައި ޖެހީ ލިންޕެން އެވެ.
ޖުމުލަ 60000 މީހުންގެ ކުރިމަތީގައި ކުޅުނު މި މެޗު ޗައިނާގައި ކުޅުނު ނަމަވެސް މިއީ ރާއްޖޭގައި ކުޅެން އޮތް މެޗެކެވެ. މެޗު ރާއްޖޭގައި ކުޅެވޭގޮތްނުވީ މިނިވަން 50 ގެ ކުޅިވަރުތަކަށް ގަލޮޅުދަނޑުގައި އެޅި ގްރާސްޕްރޮޓެކްޓާ މާގިނަ ދުވަހު ބޭއްވުމުން ވިނަތައް މަރުވެ، ފީފާގެ މިންގަނޑަށް ގަލޮޅު ދަނޑު ފެތޭގޮތްނުވުމުންނެވެ. މި ދެ ގައުމު ކުޅެންޖެހޭ ދެ ވަނަ މެޗު އޮންނާނީ އަންނަ އަހަރުގެ މާޗު މަހު އަނެއްކާވެސް ޗައިނާގަ އެވެ.
ކޮލިފައިންގައި ރާއްޖެ މިހާތަނަށް ކުޅުނު ތިން މެޗުން ވެސް ވަނީ ބަލިވެފަ އެވެ. އެއީ އަމިއްލަ ދަނޑުގައި ގަތަރު އަތުން 1-0 އިން އަދި ހޮންކޮންގައި އެ ގައުމު އަތުން 2-0 އިންނެވެ.