ޗައިނާއިން ރާއްޖޭގެ ފުޓްބޯޅަ ކުރިއެރުވުމަށް ގިނަ އެހީތަކެއް ވެދޭނެ ކަމަށް އެފްއޭއެމުން ބުނެފި އެވެ.
މިވަގުތު ޗައިނާގައި ހުންނެވި ޖެނެރަލް ސެކްރެޓަރީ ބައްސާމް އަދީލްޖަލީލް ވިދާޅުވީ ރާއްޖޭގެ ފުޓްބޯޅައިގެ އިންފްރާންސްޓްރަކްޗާ އާއި ކުޅުންތެރިންނާއި ކޯޗުން ތަމްރީނު ކުރުމުގައި މީގެ ފަހުން ޗައިނާއިން އެހީތެރިކަން ވެދޭނެ ކަމަށެވެ.
މި ގޮތަށް ހަމަޖެހުނީ ވޯލްޑް ކަޕް ކޮލިފައިންގައި އިއްޔެ ޗައިނާ އަތުން ރާއްޖެ 3-0އިން ބަލިވި މެޗުގެ ކުރިން ޗައިނާގެ ފުޓްބޯޅަ ފެޑަރޭޝަނުގެ ނާއިބް ރައީސާއެކު އެފްއޭއެމުގެ ޓީމުން ބައްދަލުކުރުމަށްފަހު ކަމަށް ވެސް ބައްސާމް ވިދާޅުވި އެވެ.
ޗައިނާއިން ރާއްޖޭގެ ފުޓްބޯޅަ އަށް އެހީވާން ނިންމިއިރު އިއްޔެ އެ ގައުމުގައި ކުޅުނު މެޗަކީ ރާއްޖޭގައި ކުޅެން އޮތް މެޗެކެވެ. މި މެޗު ރާއްޖޭގައި ކުޅެވޭގޮތްނުވީ މިނިވަން50ގެ ކުޅިވަރުތަކަށް ގަލޮޅު ދަނޑުގައި އެޅި ޓާފް ޕްރޮޓެކްޓާ މާގިނަ ދުވަހު ބޭއްވުމުން ދަނޑުގެ ވިނަތައްމަރުވެ، ފީފާގެ މިންގަނޑަށް ދަނޑު ފެތޭގޮތްނުވުމުންނެވެ. މިހެންވެ ރާއްޖެ އާއި ޗައިނާ ކޮލިފައިންގައި ކުޅެން ޖެހޭ ދެ މެޗު ވެސް ދެން ކުޅޭނީ ޗައިނާގަ އެވެ.