ފުޓްބޯޅަ އަށް ތުއްތުއިރު ކުދިން ޝައުގުވެރިކުރަންޖެހޭ ކަމަށާއި އެ މަސައްކަތް ކުރަމުން އަންނަ ފަރާތްތަކަށް ހިތްވަރުދެއްވާ ކަމަށް ރައީސުލްޖުމުހޫރިއްޔާގެ ނާއިބް އަހުމަދު އަދީބް ވިދާޅުވެއްޖެ އެވެ.
އެމަނިކުފާނު މިހެން ވިދާޅުވީ 27 ސްކޫލް ބައިވެރިކޮށްގެން އިއްޔެ ހަވީރު ސޮކާ ވެޓަރަންސް އެސޯސިއޭޝަނުން ފެށި ކުޑަކުދިންގެ ފުޓްބޯޅަ ފެސްޓިވަލް ހުޅުވައިދެއްވަމުންނެވެ.
ނާއިބް ރައީސް އަދީބު ވިދާޅުވީ ރާއްޖޭގެ އެއްވަނަ ކުޅިވަރަކީ ފުޓްބޯޅަ ކަމަށާއި މިހެންވެ ތުއްތުކުދިންނަށް ފުޓްބޯޅައިގެ ހަރަކާތްތައް އަބަދުމެ ހިންގުމަކީ ވަރަށް ބޭނުންތެރި ކަމެއް ކަމަށެވެ. އަދި މި މައްސަކަތް ކުރައްވާ ފަރާތްތަކަށް ސަރުކާރުން ހިތްވަރު ދެއްވާ ކަމަށެވެ.
"މިފަދަ މަސައްކަތް ކުރައްވާތީވެ އަޅުގަނޑު ސޮކާ ވެޓަރަންސް އެސޯސިއޭޝަނަށް ޝުކުރު އަދާކުރަން. އަދި މައިލޯ އާއި އެޑިއުކޭޝަން މިނިސްޓްރީ އާއި ބެލެނެވެރިން ނަންގަވާ ފޯރިއާއި ފުޓްބޯޅަ އަށް ތިޔަ ދެއްވާ ސަޕޯޓަށްޓަކައި ޝުކުރު ދަންނަވަން. އަޅުގަނޑުމެންގެ ގައުމީ ކުޅިވަރަކީ ފުޓްބޯޅަ. ފުޓްބޯޅަ އަށް އާކުދިން ވެއްދުމަށް މިފަދަ ޕްރޮގްރާމްތަކަކީ ވަރަށް މުހިންމު ޕްރޮގްރާމްތަކެއް،" ކުރިން ފުޓްބޯޅަ ކުޅުއްވި އަދީބް ވިދާޅުވި އެވެ.
ސޮކަ ވެޓަރަންސްއިން ފެށި ފުޓްބޯޅަ ފެސްޓިވަލް އަކީ ގްރޭޑް އެކަކުން ދަށުގެ ކުދިންނަށް އަމާޒުކޮށްފެން ބާއްވާ ފެސްޓިވަލެކެވެ. ކުރީ ފަހަރާ ހިލާފަށް މި ފަހަރުގެ ފެސްޓިވަލްގައި ދެ ކެޓަގަރީ އަކަށް ވަނީ ޓީމުތައް ބަލާހައިފަ އެވެ. އެއީ ގްރޭޑް 1ގެ ކެޓަގަރީ އާއި އޭގެ ދަށް އުމުރުފުރާތަކުގެ ކެޓަގަރީ އެވެ.