ބާސްކެޓަށް މިހާރު ކުރިމަތިވެފައިވާ އެންމެ ބޮޑު މައްސަލައަކީ އިންޑޯ ކޯޓެއް ނެތުން ކަމަށާއި އިންޑޯ ކޯޓެއްނެތި ދެން އެކުޅިވަރު ކުރިނާރާނެ ކަމަށް ބާސްކެޓް އެސޯސިއޭޝަނުން ބުނެފި އެވެ.
ޖެނެރަލް ސެކްރެޓަރީ އާރިފް ރިޒާ ވިދާޅުވީ އިންޑޯއެއްގެ ނެތުމުގެ މައްސަލަ އެތައް ފަހަރަކު ކުޅިވަރާ ބެހޭ މިނިސްޓްރީ އަށް ވެސް ދަންނަވާފައިވާ ކަމަށެވެ.
"މިހާރު ވެސް މިނިސްޓްރީން ބުނެފައި އެބައޮތް އަޅުގަނޑުމެން މިހާރު ބޭނުންކުރާ އައުޓްޑޯ ކޯޓްތަކުގެ ތެރެއިން ކޯޓެއް ހިޔާކޮށްދޭން. އެކަމަކު އެއީ ހައްލެއްނޫން. މިހާރު ބާސްކެޓަށް އެންމެ މުހިންމީ ރަނގަޅު އިންޑޯ ކޯޓެއް ދާއިމީކޮށް އޮތުން. ބާސްކެޓް ދެން ކުރިނާރާނެ ރަނގަޅު އިންޑޯ ކޯޓެއްނެތި،" އާރިފް ވިދާޅުވި އެވެ.
ޒުވާނުންގެ މަރުކަޒުގެ އިންޑޯ ހޯލަކީ ހުރިހާ ކުޅިވަރަކުން ބޭނުންކުރާ ހޯލަކަށްވުމާއެކު އެތަނުން ޖާގަ ހޯދުމަކީ ދަތިކަމެއް ކަމަށާއި ބާސްކެޓުން މިހާރު ބޭނުންކުރަނީ ސްޓޭޑިއަމް ސަރަހައްދުގެ އައުޓްޑޯ ކޯޓުތައް ކަމަށްވުމުން ބާސްކެޓްގެ ހަރަކާތްތައް ރަނގަޅަށް ގެންދިއުމަށް ވެސް ދަތިވެފައިވާ ކަމަށް ވެސް އާރިފް ވިދާޅުވި އެވެ.