ބައިބޯ އަދި ވަރުގަދަ ޗައިނާއާ ދެކޮޅަށް ވޯލްޑް ކަޕް ކޮލިފައިންގައި ރާއްޖެ އަންގާރަ ދުވަހު ނުކުތް އިރު ޓީމު އޮތީ "ވަރަ ބިނދިފަ" އެވެ. އެކަމަކު ޗައިނާއަތުން ރާއްޖެ 3-0އިން ބަލިވުމަކީ ވަރަށް ބޮޑު ކުރިއެކުމެކެވެ. އެއީ ކީއްވެ ހެއްޔެވެ؟
ނިކަން ރަނގަޅަށް ކިޔުއްވާށެވެ. ގައުމީ ފުޓްބޯޅަ ޓީމު ބައިނަލް އަގްވާމީ މެޗުތައް ކުޅެން ފެށީއްސުރެ އެންމެ ބޮޑަށް ބަލިކަށިވީ 1993ގެ ސާފް ގޭމްސްގަ އެވެ. އެއިރުގެ ކުޅުންތެރިން ބުނާގޮތުގައި އެއީ ތަށި ހޯދޭހާ ފެންވަރު ހުރި ޓީމެކެވެ. އެކަމަކު މޫސާމަނިކު (ކުޑަމޫސަ) އަށް ފާނަބަސަންދު ޖެހުމާއި މުހައްމަދު ޒާހިދު (ބައްޓޭ) އާއި އެނޫން ވެސް މުހިންމު ކުޅުންތެރިން ބަލިއެނދުގައި އޮށޯންނަން ޖެހުމުން ޓީމު ވަރަށް ބޮޑަށް ނިކަމެތިވި އެވެ.
އެއަށްފަހު މި ފަހަރުހާ ބޮޑަށް ދުވަހަކު ވެސް އަހަރުމެންގެ ޓީމެއް އަދި ބަލިވެފައެއް ނެތެވެ. ކެޕްޓަން އަލީ އަޝްފާގް (ދަގަނޑޭ) ކޮންމެވެސް ކަމަކާ ހިތްހަމަނުޖެހިގެން މެޗު ނުކުޅެން ނިންމީ އެވެ. ގައުމީ ކީޕަރު އިމްރާން މުހައްމަދާއި މިދިޔަ އަހަރުގެ ރާއްޖޭގެ އެންމެ މޮޅު ކުޅުންތެރިޔާ އަސަދުﷲ އަބުދުﷲ ތިބީ ބަލިވެ ގޭގަ އެވެ. އެންމެ ފަހު ވަގުތު މުހައްމަދު އުމޭރަށް ވެސް ކުޅެވޭގޮތެއްނުވި އެވެ. އިސްކޮޅުން ދިގު ޑިފެންޑަރު މުހައްމަދު ޝިފާން (ކުޑައްޓޭ) އާއި ރިލްވާން ވަހީދު (ކަކާ) ރިލޭ ތިބީ ޓީމުން ބާކީކޮށްފަ އެވެ. މި ހަ ކުޅުންތެރިންނަކީ ފާއިތުވެދިޔަ ފަސް އަހަރަށް ބަލާއިރު ގައުމީ ޓީމުގެ ފުރަތަމަ 11 ގައި ކުޅެމުން އައި ކުޅުންތެރިންނެވެ. އަދިވެސް އެމީހުން ޓީމުގައި ތިބެއްޖެނަމަ ފުރަތަމަ 11ގައި ފަށާނެހާ ހުނަރު ހުރި ކުޅުންތެރިންނެވެ.
އެކަމަކު މި ކުޅުންތެރިން ނެތި ތިން ލަނޑުން ރާއްޖެ ބަލިވުމަކީ ހަގީގަތުގައި ވެސް ގޯސް ނަތީޖާއެއްނޫނެވެ. އަވައްޓެރި ގައުމުތަކުން ނެރުނު ނަތީޖާތަކަށް ބަލާލުމުން މިވާހަކަ އިތުރަށް ދައްކަންނުޖެހޭނެ ކަމަށް އުއްމީދުކުރަމެވެ. ވަރުގަދަ އިރާން އަތުން އިންޑިޔާ ބަލިވީ 3-0އިންނެވެ. ޖަޕާން އަތުން އަފްގާނިސްތާން ބަލިވީ 6-0އިންނެވެ. ޖޯޑަން އަތުން ބަނގްލަދޭޝް ބަލިވީ 4-0އިންނެވެ.
އެފްއޭއެމުން ފަހަތަށް ނުބަލައި ވަރަށް ކެރިގެން ދުރު ވިސްނުންތަކެއް ނިންމުމުގެ ވަގުތު މި އޮތީ އައިސްޖެހިފަ އެވެ. މެޗުގައި އަހުމަދު ނާޝިދު (ނާއްޓޭ) އާއި އަހުމަދު އިމާޒް (އާއްކޮ) އާއި ހަމްޒާ މުހައްމަދު (ހަމްޕު) ފަދަ ޒުވާން ކުޅުންތެރިން ފުރަތަމަ ފަހަރަށް މިހާ ވަރުގަދަ މެޗަކަށް ނުކުމެ ޗައިނާގެ 60000 ސަޕޯޓަރުންގެ ކުރިމަތީގައި މޮޅަށް ކުޅުނެވެ. ކީޕަރު މުހައްމަދު އިމްރާނަށް މެޗުގެ ކުރީކޮޅު ގޯހެއް ހެދުނު ނަމަވެސް މާގިނައިރެއްނުވެ ގޭމުގެ ތެރެއަށް ރަނގަޅަށް ފަރިތަވެ، ރަނގަޅު ސޭވްތަކެއް ކުރި އެވެ. ދެންތިބި ކުޅުންތެރިންގެ ކުޅުން ވެސް މޮޅެވެ.
މި ހުރިހާ ކަމަކުން ދޭހަވަނީ ޒުވާން ކުޅުންތެރިންނަށް ފުރުސަތު ދިނުން ގިނަކުރަންޖެހޭ ކަމެވެ. އުމުރުން ދޮށިވެ، ކުޅުން ހުއްޓާލުމާ ދިމާލަށް މިސްރާބުޖަހާފައިވާ ކުޅުންތެރިންގެ ބަދަލުގައި ޒުވާން ކުޅުންތެރިންނަށް އެފްއޭއެމުން ހާއްސަ ސަމާލުކަމެއް ދޭން ޖެހިއްޖެ ކަން އެބަ ބުނެދެ އެވެ.
ވޯލްޑް ކަޕް ކޮލިފައިންގައި ރާއްޖެ އަށް ދެން އޮތީ ބޫޓާން މެޗެވެ. އައްޑޫ ސިޓީ އާއި ހދ. ކުޅުދުއްފުށީގައި ކުޅޭ ޕްރެޒިޑެންޓްސް ކަޕް ފުޓްބޯޅަ މުބާރާތް ނިމޭތާ ދެތިން ދުވަސް ފަހުން ބޫޓާނާ ދެކޮޅަށް ރާއްޖެ ނުކުންނައިރު މިއީ ޗައިނާ މެޗުގައި ހިތްވަރު ކުރި ޒުވާން ކުޅުންތެރިން އިތުބާރު ބޮޑު ކުރާ މެޗަކަށް ހެދުން މިވަގުތު މުހިންމެވެ. ސަބަބަކީ އެއަށް ފަހު ދެން އޮންނާނީ ވަރުގަދަ ގަތަރާއެކު ގައުމުން ބޭރުގައި ކުޅޭ މެޗަކަށް ވުމެވެ. ރާއްޖެ އަކީ އާއްމުކޮށް ބޫޓާންކޮށް ފަހެއް ނޫނީ ހަ ގޯލު ވައްދާލާ ގައުމެކެވެ. އެހެން ވީމާ، އެ މެޗްގައި އަދި ފަސް ލަނޑު ނޫނީ ހަ ލަނޑު ވައްދާލިޔަސް އެއީ ރާއްޖޭގެ ފުޓްބޯޅަ އަށް މޮޅެއް ނޫނެވެ. އެއަށްވުރެ ބޮޑަށް އެއީ މުޅި ޓީމު ހާނުވާލައި ހާއްސަކޮށް ޒުވާން ކުޅުންތެރިންނަށް އިސްކަންދޭ މެޗަކަށް ވެއްޖެނަމަ މުޅި ގައުމުގެ ފުޓްބޯޅަ އަށް ލިބޭ ފައިދާ ބޮޑުވާނެ އެވެ.
މިފަދަ ބަދަލުތަކަށް އެފްއޭއެމުން މިހާރު ތައްޔާރުވާން ވެއްޖެކަން ޗައިނާމެޗުން ސާބިތުވެއްޖެ އެވެ. އެކަމަކު މިފަދަ ބަދަލުތައް ގެނެވޭނީ އެފްއޭއެމް ހަރުދަނާވެގެންނެވެ. ގައުމީ ލޯބި އިސްކޮށްގެންނެވެ. ފަސްނުޖެހި ކެރިގެން ކުރިމަތިލައިގެންނެވެ.