މުބާރާތުގައި މުޅިން އަލަށް މި އަހަރު ވާދަކުރި ނަމަވެސް ޓީސީގެ އަމާޒަކީ ޕްރެޒިޑެންޓްސް ކަޕުގެ ފައިނަލް ކުޅުން ކަމަށް ކޯޗު މުހައްމަދު ނިޒާމް (ނިޒާމްބެ) ބުނެފި އެވެ.
އަންނަ އަންގާރަ ދުވަހު އައްޑޫ ސިޓީ އާއި ހދ. ކުޅުދުއްފުށީގައި ފަށާ މުބާރާތަށް ރޭ ކުޅުދުއްފުއްޓަށް ފުރުމުގެ ކުރިން ނިޒާމް ބުނީ އޭނާގެ ޓީމު އޮތީ މުބާރާތަށް ވަރަށް ރަނގަޅަށް ތައްޔާރުވެފައި ކަމަށެވެ.
"ޓީސީގެ އަމާޒަކީ އެއްކޮޅުން ފައިނަލް ކުޅުނު. ހުރިހާ ކުޅުންތެރިން ވެސް ވަރަށް ރަނގަޅަށް ޕްރެކްޓިސްކޮށްފައިވަނީ. ވަރަށް ރަނގަޅޭ ބުނެވޭނީ ތައްޔާރުވުން،" ނިޒާމްބެ ބުންޏެވެ.
އެންމެ ފަހުގެ ތިން އަހަރުގެ ޗެމްޕިއަން ނިއުރޭޑިއަންޓާއި މަހިބަދޫ އަދި ބީޖީ ހިމެނޭ ގްރޫޕްއޭއާ ބެހޭ ގޮތުން ނިޒާމްބެ ބުނީ މި ގްރޫޕަކީ ވަރަށް ހިތްހަމަޖެހޭ ގްރޫޕެއް ކަމަށެވެ.
"މި ގްރޫޕު ރަނގަޅު. އަހަރުމެންނަށް މި ގްރޫޕުން ކުރިއަށް ދެވިދާނެ. އަހަރުމެން ވިސްނައިގެން ކުޅެފިއްޔާ ކުރިން މި ބުނި ގޮތަށް މި މުބާރާތުގައި ފައިނަލަށް ދެވިދާނެ،" އައިއެފްސީ އާއި ވެލެންސިއާ އަށް ކުރިން ކުޅުނު ޑިފެންޑަރު ނިޒާމްބެ ބުންޏެވެ.