މާދަމާނޫން އަނެއް ދުވަހު ފަށާ މި އަހަރުގެ ޕްރެޒިޑެންޓްސް ކަޕް ފުޓްބޯޅަ މުބާރާތުގައި ވިކްޓަރީ އެންމެ ފުރަތަމަ ބޭނުންވަނީ ސެމީ ފައިނަލް ކުޅެން ކަމަށް އެ ޓީމުން ބުނެފި އެވެ.
ކޯޗު އަހުމަދު ނާޝިދު (ނާދު) ބުނީ ވެލެންސިއާ އާއި މާޒިޔާ އަދި އީގަލްސް ހިމެނޭ ގްރޫޕް ވަރަށް ވަރުގަދަ ކަމަށާއި މިހެންވެ ވަރަށް ފަރުވާތެރިވެގެންނޫނީ ވިކްޓަރީ އަށް ކުރިއަށްދާން އުނދަގޫވާނެ ކަމަށެވެ.
"އެއްވެސް ޓީމަކަށް ފަސޭހަނުވާނެ. ހާއްސަކޮށް އަހަރުމެން ޓީމަށް މި ގްރޫޕް އުނދަގޫވާނެ. ލީގަށް ބަލާއިރު ވެސް އެންމެ ރަނގަޅަށް ނަތީޖާ ނެރެމުން އަންނަ ޓީމުތައް މިއޮތީ މި ގްރޫޕުގައި. އަހަރުމެން ފުރަތަމަ ބަލާނީ ސެމީ ފައނަލާ ހިސާބަށް ދެވޭތޯ،" ފުރަތަމަ މެޗުގައި ބުދަ ދުވަހު އީގަލްސްއާ ދެކޮޅަށް ނުކުންނަ ކޯޗު ބުންޏެވެ.
ނާދު ބުނީ ޓީމުގައި އަނިޔާގެ އެއްވެސް މައްސަލައެއް ނެތް ކަމަށެވެ. އަދި މުބާރާތް އައްޑޫގައި ކުޅުމަކީ އޭގެ ފައިދާ ހުރިހާ ޓީމަކަށް ވެސް ލިބޭނެ ކަމެއް ކަމަށް ނާދު ފާހަގަ ކުރި އެވެ.
"މިއީ ވަރަށް ރަނގަޅު ކަމެއް. ސަޕޯޓަރުން ކުރިމަތީގައި މެޗު ކުޅެން ފުރުސަތު ލިބުން. ކޮންމެ ޓީމަކަށް ވެސް މި ފޯރި އަންނާނެ. އަނެއްކާ މިއީ އާ ސަޕޯޓަރުން ހޯދުމަށް ވެސް ކުލަބުތަކަށް ލިބޭ ފުރުސަތެއް،" ނާދު ބުންޏެވެ.
ވިކްޓަރީ އަކީ ގައުމީ މުބާރާތުގެ އެންމެ ކާމިޔާބު ޓީމެވެ. ދެ ފަހަރު ތަށި މިލްކުކޮށްފައިވީ ނަމަވެސް އެންމެ މޮޅު ކުޅުންތެރިން ވިކްޓަރީ އަށް ގެއްލުނު ހިސާބުން ވިކްޓަރީގެ އަމާޒު މިވަނީ ބަދަލުވެފަ އެވެ.