ކޮވިޑް-19 އިގެ ނުރައްކާ ރާއްޖޭގައި ވެސް ބޮޑުވުމާއި ގުޅިގެން ސިއްހީ ހިދުމަތްތެރިން ހިދުމަތަށް ނުކުތުމަށް ތައްޔާރަށް ތިބުމަށް ހެލްތް މިނިސްޓަރު އަބްދުﷲ އަމީން ގޮވާލައްވައިފި އެވެ.
މިއަދު ދަރުބާރުގޭގައި ބޭއްވި ނޫސްވެރިންގެ ބައްދަލުވުމެއްގައި ހެލްތު މިނިސްޓަރު އަބްދުﷲ އަމީން ވިދާޅުވީ މާލެއިން ބައްޔަށް މީހަކު ޕޮޒިޓިވްވުމަކީ ވަރަށް ބޮޑު ކަންބޮޑުވުމެއް ކަމަށާ އެކަމާ ގުޅިގެން އަޅަންޖެހޭ ފިޔަވަޅުތައް ވަގުތުން އަޅަން ފަށާފައިވާ ކަމަށެވެ.
މާލެ ކަހަލަ ބޮޑު އާބާދީއެއް އޮތް ރަށެއްގައި މި ފަދަ ބައްޔެއް ފެތުރެން ފަށައިފިނަމަ އެއީ ވަރަށް ބޮޑު ނުރައްކަލެއް ކަމަށް ބަލައިގެން ކަންކަން އިންތިޒާމް ކުރަމުންދާ ކަމަށް ވެސް ވިދާޅުވި އެވެ. އަމީން ވަނީ ކުރިމަތިވެދާނެ ހާލަތަކަށް އެހީތެރިވުމަށް ހުރިހާ ސިއްހީ އެހީތެރިން ވެސް ތައްޔާރީ ހާލަތުގައި ތިއްބެވުމަށް އެދި ވަޑައިގަންނަވާ ކަމަށެވެ.
"މާލެއަކީ ހުރިހާ ކަމެއްވެސް ނާރެސް. މާލެއިން ބަލި ފެނުމުން އޭގެ ނުރައްކާ އިތުރުވެެގެންދާނެ ކަމަށް ބަލައިގެން އަޅުގަނޑުމެންގެ ކަންކަން ކުރަން ޖެހޭނީ. އެހެންވީމަ ރާއްޖޭގެ ހުރިހާ ހިސާބެއްގައި ތިއްބެވި ސިއްހީ ހިދުމަތްތެރިންނަށް މިއަދު އަޅުގަނޑު އިލްތިމާސްކުރަނީ، މި މަސައްކަތުގެ ފްރަންޓް ލައިނަށް ހުރިހާ އެންމެން ނުކުތުމަށް ގޮވާލާ ވަގުތަށް ތައްޔާރުވާށޭ. ހާއްސަކޮށް މާލެ ސަރަހައްދުގައި އަޅުގަނޑުމެން ތައްޔާރުވެފައި މިވަނީ ބަލި ފެތުރިގެންދާނެ މިންވަރަށް ބަލާ ފަރުވާގެ ކަންކަން އިންތިޒާމްވެ، މި ތިބީ ތައްޔާރަށް. އެހެން ކަމުން ހިދުމަތުގައި ތިއްބެވި ބޭފުޅުންނާއި، ކުރިން ހިދުމަތް ކުރައްވާފައި ތިއްބެވި ބޭފުޅުންނާއި، ސިއްހީ ހިދުމަތްތަށް ތަމްރީނުވެފައި ތިބި ހުރިހާ ބޭފުޅުންވެސް ހިދުމަތަށް ނިކުތުމަށް ތައްޔާރުވެވަޑަައިގަތުމަކީ ވަރަށް ބޮޑު އިލްތިމާސެއް." އަމީން ވިދާޅުވި އެވެ.
މާލެއިން މީހަކު ކޮވިޑް-19 އަށް ޕޮޒިޓިވްވުމާއި ގުޅިގެން އޭނާއާ ޑައިރެކްޓް ކޮންޓެކްޓެއްވި ހުރިހާ މީހުން މިހާރު ވަނީ ދެނެގަނެފަ އެވެ. ކޮވިޑް-19 އަށް ޕޮޒިޓިވްވެފައިވަނީ ދިވެހި އަންހެނެކެވެ. އޭނާ މިހާރު ވަނީ އައިސޮލޭޝަން ފެސިލިޓީއަކަށް ގެންގޮސްފަ އެވެ. އޭނާ ދިރިއުޅޭ ގޭގެ ސަރަހައްދު ވެސް ވަނީ ބަންދުކޮށްފަ އެވެ.