މާސްކު ނާޅައިގެން އެކަކު ހަ ފަހަރު ޖޫރިމަނާ

މާސްކު ނާޅައި ބޭރުގައި އުޅުނު 2428 މީހަކު ހުއްޓުވައި ޖޫރިމަނާ ކޮށްފައިވާއިރު އެކަކު ހަ ފަހަރަށް ޖޫރިމަނާ ކޮށްފައިވާ ކަމަށް ފުލުހުން އިދާރާއިން ބުނެފި އެވެ.

ސިއްހީ ކުއްލި ހާލަތުގެ ދަށުން ޑިރެކްޓާ ޖެނެރަލް އޮފް ޕަބްލިކް ހެލްތަށް ލިބިދޭ ބާރުގެ ދަށުން، ބޭރަށް ނުކުމެ އުޅޭއިރު އަނގަ އާއި، ނޭފަތުގެ އިތުރުން ދަތްދޮޅި ނިވާވާ ގޮތަށް މާސްކު އެޅުން މަޖުބޫރުކޮށްފައި ވަނީ މިމަހުގެ ހަތަރުވަނަ ދުވަހުން ފެށިގެނެވެ.

އެޗްޕީއޭގެ އުސޫލުގައިވާ ގޮތުން ދެ އަހަރު ދަށުގެ ކުޑަކުދިންނާއި، ކަސްރަތު ކުރާ ވަގުތުތަކުގެ އިތުރުން މީހެއްގެ އެހީއާ ނުލައި މާސްކު ނޭޅޭ މީހުން ފިޔަވައި އެހެން ހުރިހާ މީހުން ބޭރުގައި އުޅޭއިރު މާސްކު އެޅުން ވަނީ ލާޒިމެވެ. އެ އެންގުން ތަންފީޒު ކުރުމުގައި ފުލުހުން މިއަދު ވަނީ ހަރަކާތްތެރިވާން ފަށާފަ އެވެ.

މާސްކު ނާޅާ ބޭރުގައި އުޅޭ މީހުން 1،000 ރުފިޔާއިން ޖޫރިމަނާ ކުރެ އެވެ.

ރޭ އެޗްއީއޯސީން ބޭއްވި ނޫސްވެރިންގެ ބައްދަލްވުމުގައި ޗީފް ސުޕްރިންޓެންޑެންޓް އޮފް ޕޮލިސް އަބްދުﷲ ޝަރީފް ވިދާޅުވީ މާސްކު ނާޅާ ބޭރުގައި އުޅެގެން މިހާތަނަށް 2428 މީހަކު ޖޫރިމަނާ ކޮށްފައިވާ ކަމަށެވެ. އޭގެ ތެރެއިން އެކަކު ހަ ފަހަރު ވަނީ ޖޫރިމަނާ ކޮށްފަ އެވެ. އަދި 137 ބިދޭސީން ވެސް ޖޫރިމަނާ ކޮށްފައިވާ ކަމަށް ޝަރީފް ވިދާޅުވި އެވެ.

ޝަރީފް ވިދާޅުވީ މާސްކު ނާޅާ އުޅެގެން ޖޫރިމަނާ ކުރި މީހުންގެ ތެރޭގައި ގިނައީ އުމުރުން 18 އަހަރާއި 40 އަހަރާ ދެމެދުގެ މީހުން ކަމަށެވެ. އެ އުމުުރުގެ 1951 މީހަކު ވަނީ ޖޫރިމަނާ ކޮށްފައެވެ.

ކާފިއުތެރޭ އެކަކު ހަތްފަހަރު ޖޫރިމަނާ

ޝަރީފް ވިދާޅުވީ ކާފިއު ހިންގަން ފެށިފަހުން ބޭރުގައި އުޅެގެން 3249 މީހަކު ޖޫރިމަނާ ކޮށްފައިވާ ކަމަށެވެ. އޭގެ ތެރޭގައި ވެސް ގިނައީ އުމުރުން 18 އަހަރާއި 40 އަހަރާ ދެމެދުގެ މީހުންނެވެ. އެ އުމުރުގެ 2869 މީހަކު ވަނީ ޖޫރިމަނާ ކޮށްފަ އެވެ.

ކާފިއު ވަގުތު ބޭރުގައި އުޅެގެން އެކަކު ހަތް ފަހަރު ވަނީ ޖޫރިމަނާ ކޮށްފަ އެވެ.

ކާފިއު ވަގުތަކީ ރޭގަނޑު 10 ކުން ފެށިގެން ފަތިހު ފަހަކަށެވެ. ނަމަވެސް ފަތިސް ނަމާދަށް މިސްކިތަށްދާ މީހުން ޖޫރިމަނާ ނުކުރާނެއެވެ. މީގެ އިތުރުން ރެއިން ފެށިގެން ރޭގަނޑު 8 ކުން ފަތިހު ފަހަކަށް ވެހިކަލް ދުއްވުންވެސް ވަނީ މަނާކޮށްފައެެވެ.

ޖޫރިމަނާކޮށްގެން ދައުލަތަށް 5.6 މިލިއަން ރުފިޔާ

އެޗްޕީއޭއިން ކަނޑައަޅާފައިވާ އުސޫލުތަކާއި ހިލާފުވެގެން މިހާތަނަށް 5677 މީހުން ވަނީ ޖޫރިމަނާ ކޮށްފައެވެ. ކޮންމެ ފަހަރަކު ޖޫރިމަނާ ކުރަނީ 1000 ރުފިޔާއިންނެވެ.

އެހެން ކަމުން ޖޫރިމަނާގެ އަދަދު 5،677،0000 މިލިއަން ވަނީ އަރާފައެވެ.

މާސްކު ނާޅާ ބޭރުގައި އުޅުމާއި ކާފިއު ވަގުތު ބޭރުގައި އުޅުމުގެ އިތުރުން މަނާ ގަޑީގައި ވެހިކަލް ދުއްވައިފިނަމަވެސް ދެން ޖޫރިމަނާ ކުރާނެއެވެ. ފުލުހުން ބުނީ ފުރަތަމަ ފަހަރު ނަސޭހަތް ދިނުމަށްފަހު ކުށް ތަކުރާރުކޮށްފިނަަމަ ޖޫރިމަނާ ކުރާނެ ކަމަށެވެ. އަދި ތިންވަނަ ފަހަރު ވެހިކަލް ޓޯކުރާނެ ކަމަށެވެ. ވެހިކަލް ދެން ދޫކުރާނީ ޖޫރިމަނާ ފައިސާ ދެއްކުމުންނެވެ.