ރާއްޖެއިން ކޮވިޑް-19 ޖެހުނު މީހުންގެ މިވަގުތު ރަނގަޅުނުވެ ތިބި މީހުންގެ އަދަދު 1،000 ވުރެ ދަށްވެއްޖެ އެވެ. ރާއްޖެއިން މިހާތަނަށް 11,232 މީހަކަށް ކޮވިޑް ޖެހިފައިވެއެވެ.
ކޮވިޑްގެ ބަލިމަޑުކަމުގައި ދިވެހިން 226 ދުވަސް ހޭދަ ކޮށްފައިވާއިރު މިވަގުތު އެކްޓިވް ކޭސްތަކުގެ އަދަދު ވަނީ ހާހަކަށްވުރެ ދަށްވެފައެވެ. ރާއްޖޭގައި މިވަގުތު ތިބި ކޮވިޑްގެ ބަލި މީހުންގެ އަދަދަކީ 988 މީހުންނެވެ. އޭގެ ތެރެއިން 39 މީހަކަށް ފަރުވާ ދެނީ ހޮސްޕިޓަލްގައެވެ.
ރާއްޖެއިން ކޮވިޑް ޖެހުނު މީހުންގެ ތެރެއިން 10,200 މީހަކު ވަނީ ކޮވިޑުން ރަނގަޅު ވެފަ އެވެ. އެއީ ކޮވިޑް ޖެހުނު މީހުންގެ ތެރެއިން 90.81 ޕަސެންޓް މީހުންނެވެ. ކޮވިޑްގައި 37 މީހަކު ވަނީ މަރުވެފަ އެވެ. ކޮވިޑްގައި އެންމެ ފަހުން މީހަކު މަަރުވީ އިއްޔެ އެވެ. އިއްޔެ މަރުވީ އުމުރުން 80 އަހަރުގެ ދިވެހި ފިރިހެނެކެވެ. އެއީ ހުޅުމާލެ މެޑިކަލް ފެސިލިޓީގައި ފަަރުވާ ދެމުންދިޔަ މީހެކެވެ. އިއްޔެވެސް ކޮވިޑްގައި ދިވެހި ފިރިހެނަކު މަރުވިއެވެ.
ކޮވިޑްގައި ރާއްޖެ ހޭދަކުރި އެންމެ އުނދަގޫ ދުވަސްތަކަކީ އޮގަސްޓް މަހުގެ ދުވަސްތަކެވެ. އެ މަހު އެކަނިވެސް 3،900 މީހަކަށް ބަލި ޖެހުނެވެ. 12 މީހަކު މަރުވިއެވެ. ނަމަވެސް ސެޕްޓެންބަރުން ފެށިގެން އެ ނަންބަރު ވަނީ ދަށްވާން ފަށާފައެވެ. މިއަދު ޕޮޒިޓިވްވީ 24 މީހެކެވެ. އެއީ 20 ދިވެހިިންނާއި ހަތަރު ބިދޭސީންނެވެ. މިއީ މި ފަހުން އެންމެ މަދުން މީހުން ޕޮޒިޓިވްވީ ދުވަހެވެ. މި ދިޔަ ސާޅީސް ފަސް ދުވަހުގެ ތެރޭގައި 100 އިން މައްޗަށް ކޮވިޑް ޖެހުނު މީހުންގެ އަދަދު އެރީ އެންމެ ދުވަހަކުއެވެ. ކޮވިޑް ކޮންޓްރޯލް ކުރުމަށް ހަރުކަށި ފިޔަވަޅުތައް އެޅި ނަމަވެސް ކޮވިޑް ފެތުރޭ މިންވަރު ދަށަށްދާން ފެށުމުން ބައެއް ފިޔަވަޅުތަކަށް ވަނީ ލުއި ދީފައެވެ.
އެ ގޮތުން ކާފިއު ގަޑި ކުރުކޮށް ހޮޓާ،ކެފޭ އަދި ރެސްޓޯރަންޓްތައް ހުޅުވޭ ވަގުތު ވަނީ އިތުރުކޮށްފައެވެ. މިހާރު ކާފިއު ވަގުތަކީ ރޭގަނޑު 11 އިން ފެށިގެން ފަތިހު ހަތަރަކަށެވެ. ކާބޯތަކެތީގެ ހިދުމަތްދޭ ތަންތަންވެސް ރޭގަނޑު 10:30 ވަންދެން ހުޅުވާފައި ބެހެއްޓެއެވެ.