މިދިއަ 24 ގަޑިއިރުގެ ތެރޭ ރާއްޖެއިން ކޮވިޑަށް 84 މީހަކު ޕޮޒިޓިވްވެއްޖެ އެވެ. މިހާރު ރާއްޖޭގެ ކޮވިޑް ޖެހުނު މީހުންގެ އަދަދަކީ 11,505 އިން މައްޗެވެ.
މިއަދުގެ އިރު އޮއްސުމާ ހަމައަށް އެއްކޮށްފައިވާ ހިސާބުތަކާ ހަވަލާ ދީ އެޗްޕީއޭއިން މިރޭ ބުނި ގޮތުގައި ކޮވިޑް ބަލި ޖެހުނު މީހުންގެ ތެރެއިން 30 މީހުންނަކީ ވެސް މާލޭ ސަރަހައްދުން ބަލި ޖެހުނު މީހުނެވެ. އަނެއް 54 މީހުން ޕޮޒިޓިވްވީ އަތޮޅުތެރެއިންނެވެ. މިއީ މާލެ ސިޓީއަށްވުރެ ގިނައިން އަތޮޅުތެރެއިން ކޮވިޑްގެ ޕޮޒިޓިވް ކޭސް ފެނުނު ފުރަތަމަ ފަހަރެވެ.
އަލަށް ޕޮޒިޓިވްވި މީހުންގެ ތެރޭ 26 ދިވެހިން ހިމެނެ އެވެ. ދެން ހިމެނެނީ 58 ބިދޭސީންނެވެ. މިއަދު ޓެސްޓް ކުރީ 2،231 ޓެސްޓެވެ. މިއީ ރާއްްޖޭގައި އެންމެ ގިނަ ބަޔަކު ކޮވިޑަށް ޓެސްޓްކުރި ދުވަސްވެސް މެއެވެ.
މިވަގުތު ރާއްޖޭގައި ކޮވިޑުން ރަނގަޅު ނުވެ ތިބީ 937 މީހުންނެވެ. ކޮވިޑްގައި 37 މީހަކު ވަނީ މަރުވެފަ އެވެ. މިވަގުތު ވެސް ހޮސްޕިޓަލްގައި އެޑްމިޓްކޮށް 32 މީހަކަށް ދަނީ ފަރުވާ ދެމުންނެވެ.
އަތޮޅުތަކުން 22 ރަށެއްގައި 45 މީހަކަށް ބަލިޖެހިފައި ވެއެވެ. އެޗްޕީއޭއިން ބުނީ 24 ރިސޯޓެއްގައި 26 ފަތުރުވެރިންނާއި 82 މުވައްޒިފުންނަށް ވެސް ބަލި ޖެހިފައިވާ ކަމަށެވެ. މިވަގުތު މާލެ ސިޓީގެ އިތުރުން މޮނިޓަރިންގައި އޮތީ ކުޅުދުއްފުށްޓެވެ.