އެކްޝަން ޑްރާމާ "ބާޣީ4" އާއި "ހީރޯޕަންތީ" ސީކުއަލްގެ މަސައްކަތް ފަށަން ޓައިގާ ޝްރޮފް ތައްޔާރުވާން ފަށައިފި އެވެ.
ޓައިގާ ކުރި ޓުވީޓެއްގައި ބުނެފައިވަނީ މި ދެ ފިލްމަކީ ވެސް އޭނާގެ މެންޓޯ އަދި ޕްރޮޑިއުސަރު ސާޖިދު ނަދިއަދްވާލާގެ ދެ ފިލްމު ކަމަށާއި "ހީރޯޕަންތީ 2"ގެ ޝޫޓިން ވަރަށް އަވަހަށް ފަށަން ހަމަޖެހިފައިވާއިރު "ބާގީ 4"ގެ އިތުރު ތަފްސީލު ވެސް ވަރަށް އަވަހަށް ފޭނުންނާ ހިއްސާ ކުރާނެ ކަމަށެވެ.
މި ދެ ފިލްމުގެ ޝޫޓިން ދުނިޔޭގެ 25 ގައުމެއްގައި ކުރިޔަށް ގެންދަން ވަނީ ހަމަޖެހިފަ އެވެ. "ހީރޯޕަންތީ 2"ގެ ޝޫޓިން ފެށޭނެ ކަމަށް މިހާރު ލަފާ ކުރެވެނީ އަންނަ ޑިސެމްބަރު މަހުގެ ތެރޭގަ އެވެ.
"ބާގީ 4" ޑައިރެކްޓްކުރާނީ އެ ސިލްސިލާގެ ދެ ވަނަ އަދި ތިން ވަނަ ފިލްމު ވެސް ޑައިރެކްޓްކުރި އަހުމަދު ޚާނެވެ.
"ބާގީ"ގެ ފުރަތަމަ ފިލްމުގައި ޓައިގާ އާއެކު ބަތަލާގެ ބައި ކުޅުނީ ޝްރައްދާ ކަޕޫރެވެ. ދެ ވަނަ ފިލްމުގައި ޓައިގާ އާއެކު ފެނިފައިވަނީ އޭނާގެ ހަގީގީ ލޯބިވެރިޔާ ދިޝާ ޕަޓްނީ އެވެ. ތިން ވަނަ ފިލްމުގައި އަނެއްވެސް ބައިވެރިވީ ޝްރައްދާ އެވެ. ހަތަރު ވަނަ ފިލްމުގެ ބަތަލާއެއް އަދި އިއުލާނެއް ނުކުރެ އެވެ.