އެމެޒޯން އިން އެމްޖީއެމް ގަނެފި

އެމެޒޯން އިން ހޮލީވުޑްގެ މަޝްހޫރު އެންޓަޓޭންމެންޓް ކުންފުނި މެޓްރޯ ގޯލްޑްވިން މޭޔާ (އެމްޖީއެމް) ގަނެފި އެވެ.

އެމެޒޯން އިން އެމްޖީއެމް ގަނެފައިވަނީ 8.45 ބިލިއަން އެމެރިކާ ޑޮލަރަށެވެ. މި އަދަދަކީ އެމްޖީއެމް އިން އެކުންފުނި ވިއްކާލަން މިދިޔަ އަހަރު ޑިސެމްބަރު މަހު އިއުލާން ކުރި ފަސް ބިލިއަން ޑޮލަރަށްވުރެ އެތައް ގުނައެއް ބޮޑު އަދަދެކެވެ.

އެމެޒޯނުން އެމްޖީއެމް ގަންނަން އުޅޭ ކަމުގެ ހަބަރުތައް މި މަހުގެ 24 ވަނަ ދުވަހު ވޯލްސްޓްރީޓް ޖާނަލްގައި ވަނީ އާންމުކޮށްފަ އެވެ.
މި ޑީލްގެ ސަބަބުން އެމެޒޯނަށް މިހާރު އެމްޖީއެމްގެ 4،000 އަށް ވުރެ ގިނަ ފިލްމް އަދި 17،000 ގަޑިއިރުގެ ޓީވީ ކޮންޓެންޓް ލިބިގެންދާނެ އެވެ.

އެމެޒޯންއިން އެ ކުންފުނީގެ ސްޓރީމިން ސާވިސް، އެމެޒަން ޕްރައިމް ވިޑިއޯގެ ހިދުމަތް ތަރައްގީ ކުރަން ނިންމާ، ކުރިއަށް ގެންދިޔަ މި ޑީލްގެ ސަބަބުން ހިދުމަތް ބޭނުންކުރާ މީހުންގެ އަދަދު ގިނަވާނެ އެވެ.

މިއީ ވަރަށް ގިނަ ބޮޑެތި ކުންފުނިތަކުން ފިލްމް ސްޓޫޑިއޯތައް ގަނެ އެ ކުންފުނިތަކުގެ ސްޓްރީމިން ސާވިސް ވަރުގަދަ ކުރަމުން އަންނަ ދުވަސްކޮޅެކެވެ.