ކޮވިޑް-19 އަށް ޕޮޒިޓިވްވެ ގދ. ތިނަދޫގައި ފަރުވާދެމުން ދިޔަ މީހަކު މަރުވެއްޖެ އެވެ.
ގއ. ތިނަދޫ ކައުންސިލްގެ ރައީސް ސައުދު އަލީ ވިދާޅުވީ މަރުވެފައިވަނީ އުމުރުން 70 އަހަރުގެ ފިރިހެނެކެވެ.
ތިނަދޫ ކޮވިޑް ފެސިލިޓީގައި ފަރުވާދެމުން ދަނިކޮށް އެ މީހާ މަރުވީ މިއަދު މެންދުރުފަހުގެ ވަގުތެއްގަ އެވެ.
މިއީ ކޮޮވިޑް ބަލީގައި މިއަދު މަރުވި ދެވަނަ މީހާ އެވެ. އަދި ކޮވިޑް ބަލީގައި ތިނަދޫގައި މަރުވި ތިންވަނަ މީހާ އެވެ.
ކޮވިޑްގައި މިއަދު ފުރަތަމަ މީހަކު މަރުވެފައި ވަނީ ގއ. ވިލިނގިލީގަ އެވެ. އެއީ އެރަށަށް ނިސްބަތްވާ އުމުރުން 81 އަހަރުގެ އަންހެނެ ކެވެ. އޭނާ މަރުވީ ރޭ ފަތިހު 4:55 ހާއިރު އެވެ.
މިއަދުގެ ދެ މަރަށް ފަހު ކޮވިޑް ޖެހިގެން ރާއްޖެއިން މަރުވި މީހުންގެ އަދަދު މިވަނީ 213 އަށް އަރާފަ އެވެ.
އިއްޔެގެ ނިޔަލަށް ރާއްޖެއިން 73،798 މީހަކަށް ވަނީ ކޮވިޑް ޖެހިފަ އެވެ. މީގެ ތެރެއިން 69،974 މީހަކު ވަނީ ބަލިން ރަނގަޅުވެފަ އެވެ.
މިހާތަނަށް ބަލިން ރަނގަޅު ނުވެ ތިބީ 3،602 މީހެކެވެ. ހޮސްޕިޓަލްގައި ފަރުވާ ދެމުން ދަނީ 28 މީހަކަށެވެ.
