އަންނަ އަހަރު ފާހަގަ ކުރާ ރާއްޖޭގެ ޓޫރިޒަމްގެ ރަންޔޫބީލާ ދިމާކޮށް "50 އަހަރު" ގެ ސްޓޭމްޕެއް ބެލްޖިއަމްގައި ނެރެފި އެވެ.
ޒޫމް މެދުވެރިކޮށް މިއަދު ބޭއްވި ރަސްމިއްޔާތުގައި ހާއްސަ ސްޓޭމްޕް ނެރެ ދެއްވީ ބެލްޖިއަމާއި ޔޫރަޕިއަން ޔޫނިއަންއަށް ރާއްޖޭން ކަނޑައަޅާފައި ހުންނަވާ ސަފީރު އަދި ކުރީގެ ޓޫރިޒަމް މިނިސްޓަރު ހަސަން ސޯބިރެވެ. މި ރަސްމިއްޔާތުގައި ޓޫރިޒަމް މިނިސްޓަރު ޑރ. އަބްދުﷲ މައުސޫމްގެ އިތުރުން އެމްއެމްޕީއާރުސީގެ މެނޭޖިން ޑިރެކްޓަރު ތޮއްޔިބު މުހައްމަދު ވެސް ބައިވެރިވަޑައިގަތެވެ.
ޓޫރިޒަމް މިނިސްޓަރު މައުސޫމް ވިދާޅުވީ މި ސްޓޭމްޕް ނެރުނުން ވެގެން ދާނީ ޓޫރިޒަމް ރަންޔޫބީލްގެ ހަރަކާތްތަކުގެ ފެށުމަށް ކަމަށާ، މިފަދަ ކަމެއް ބެލްޖިއަމްގައި ހުންނަ އެމްބަސީން އިސް ނަގައިގެން ކުރުމަކީ އުފާ ކުރައްވާ ކަމެއް ކަމަށެވެ.
ޔޫރަޕިއަން ޔޫނިއަނަށް ރާއްޖޭން ކަނޑައަޅާފައި ހުންނަވާ ސަފީރު ހަސަން ސޯބިރު ވިދާޅުވީ ރާއްޖެ އިސްތިހާރު ކުރަން މި ސްޓޭމްޕް ބޭނުން ކުރައްވާނެ ކަމަށެވެ.
ރާއްޖެއަށް ޓޫރިޒަމް ތައާރަފުވީ 1972 ވަނަ އަހަރު އެވެ. ފުރަތަމަ ރާއްޖެއަށް އައިސްފައި ވަނީ އޭރުގެ ސިލޯން އަދި މިިހާރުގެ ސްރީލަންކާ މަގުން ރާއްޖެ އަށް އައި އިޓަލީގެ ޓޫރިސްޓުންގެ ގްރޫޕެކެވެ.