އައްޑޫ ސިޓީން ކޮވިޑް ޖެހުނު މީހުންގެ އަދަދު 1075 އަށް އަރައިފިއެވެ. އައްޑޫ އިކުއަޓޯރިއަލް ހޮސްޕިޓަލުން ބުނީ މިދިޔަ ސައުވީސް ގަޑިއިރުގެ ތެރޭގައި އިތުރު ނުވަ މީހަކު ބައްޔަށް ޕޮޒިޓިވްވެފައިވާ ކަމަށެވެ.
އެ ހޮސްޕިޓަލްގެ ތަފާސް ހިސާބުތައް ދައްކާ ގޮތުން އައްޑޫ ސިޓީގެ މަރަދޫގައި 138 ކޭސް، ހިތަދޫގައި 86 ކޭސް، މީދޫގައި 32 ކޭސް އަދި ފޭދޫގައި 28 ކޭސްގެ އިތުރުން މަރަދޫފޭދޫގެ 10 ކޭސް އާއި ހުޅުދޫގެ 10 ކޭސް ހިމެނޭހެން ޖުމްލަ 305 އެކްޓިވް ކޭސަސް އެ ސިޓީގައިވެއެވެ.
ބަލި ޖެހިފައިވާ މީހުންގެ ތެރެއިން ހަތަރު މީހަކަށް ފަރުވާ ދެނީ ހޮސްޕިޓަލްގައި އެޑްމިޓްކޮށްގެންނެވެ.
ޕޮޒިޓިވް ކޭސްތަކާއި ގުޅިގެން 685 މީހަކު ވަނީ ކަރަންޓީން ކޮށްފައެވެ. އެއީ މުޅީންވެސް ޑައިރެކްޓް ކޮންޓެކްޓުންނެވެ.
މިހާތަނަށް އެ ސިޓީން ނަގާފައިވާ 219 ސާންޕަލެއްގެ ނަތީޖާ އަދި ލިބިފައެއް ނުވެއެވެ.
ކޮވިޑްގައި އައްޑޫސިޓީން ތިން މީހަކު ވަނީ މަރުވެފައެވެ.