ގަދަ ކަމުން ދިވެހި ޒުވާން ފިރިހެނަކު ބަރަހަނާކޮށް އެ މަންޒަރު ވީޑިއޯކުރި މައްސަލަ ފުލުހުން ރަނގަޅަށް ތަހުގީގު ނުކުރާ ކަމަށް ވިދާޅުވެ މާފަންނު އުތުރު ދާއިރާގެ މެންބަރު އިމްތިޔާޒު ފަހުމީ ވަރަށް ބޮޑަށް ފާޑު ވިދާޅުވެއްޖެ އެވެ
އިމްތިޔާޒް މިފަދައިން ވިދާޅުވީ ފުލުހުން ލ. ކަލައިދޫ، ސުވީޓް ހާޓް / އަހުމަދު ސިރާޖަށް އަނިޔާ ކުރިކަމަށް ބުނާ މައްސަލަ، ސަލާމަތީ ހިދުމަތްތަކާ ބެހޭ ކޮމިޓީ ދިރާސާކޮށް ނިންމިގޮތުގެ ރިޕޯޓަށް މަޖިލީހުގައި މިއަދު ކުރި ބަހުސްގަ އެވެ.
އެ ބަހުސްގައި އިމްތިޔާޒު ވިދާޅުވީ މީހަކު ގަދަ ކަމުން ބަރަހަނާކޮށް ވީޑިއޯ ކުުރުމަކީ ވަރަށް ދަށު ދަރަޖައިގެ ކަމެއް ކަމަށާއި އެކަމާ ވަރަށް ބޮޑަށް ކަންބޮޑުވެ ވަޑައިގަންނަވާ ކަމަށެވެ. އަދި އޭނާ އެކަން ސިފަ ކުރެއްވީ ގުއަންޓަނަމޯ ބޭގައި މުސްލިމުންނަށް ދިން ލާއިންސާނީ އަނިޔާތަކާ އެއްފަދަ އަމަލެއްގެ ގޮތުގަ އެވެެ.
އެ މައްސަލަ މަޖިލީހުގެ ހިއުމަން ރައިޓްސް އެންޑް ޖެންޑާ ކޮމިޓީން ބަލަމުން ދާއިރު އެ ކޮމިޓީން މިހާތަނަށް ބެލި ބެލުމުން އެ މައްސަލަ ފުލުހުންނަށް ހުށަހަޅާފައި ވަނީ މިިދިޔަ އޭޕްރީލް މަހުގެ 17 ގައި ކަަމަށް އެނގިފައިވާކަން ވެސް އިމްތިޔާޒް ފާހަގަ ކުރެއްވި އެވެ.
"ކިތައް މަސްތޯ އެ ދިޔައީ މިވަރުގެ މައްސަަލައެއް ކޮޅެއްގައި ނުޖެހި. ފުލުހުން ފާހަގަ ކުރެއްވި ކަންތައްތަކުގެ ދެ ފަރާތެއް ތަހުގީގަށް ދެނެގަނެފައިވާކަން. އަދި މިވަގުތު ކުރެވެމުން ދަނީ އިތުރު ދެ ފަރާތްތަކުގެ މައުލޫމާތު ހޯދައި ބަޔާންތައް ނެގުމުގެ މަސައްކަތް. މިއީ ވަރަށް އާދައިގެ މަސައްކަތެއް. އެއްވެސް ފަރާތެއް ހައްޔަރެއްގައި ނެތް. ހަމަގައިމުވެސް މި މައްސަލަ ސީރައަސްކޮށް ބަލައިފިނަމަ މައްސަލައިގައި ހިމެނޭ މީހުން ނޭނގި ނުދާނެ،" އިމްތިޔާޒް ވިދާޅުވި އެވެ.
އިމްތިޔާޒް ވިދާޅުވީ އެ ތަހުގީގު ކޮންމެވެސް މީހެއްގެ ނުފޫޒެއް ވަދެ ތަހުގީގު ރަނގަޅަށް ކުރިއަށް ނުގެންދާ ކަމަށް ގަބޫލު ކުރައްވާ ކަމަށެވެ. އެހެންކަމުން އެ މައްސަލަ ސީރިއަސް މައްސަލައެއްގެ ގޮތުގައި ކަމާ ބެހޭ ފަރާާތްތަކުން ބަލަން އޭނާ ގޮވާލެއްވި އެވެ.
ޒުވާނާކަށް އަނިޔާކޮށް ބަރަހަނާކޮށް ވީޑިއޯ ކުރި މީހުންގެ ތެރޭގައި ވެސް ސަރުކާރު ކުންފުންޏެއްގެ މެނޭޖިން ޑިރެކްޓަރެއްގެ ކޮއްކޮ ހިމެނޭ ކަމަށް އަޑުތައް ފެތުރިފައި ވެއެވެ. ބަރަހަނާކުރި އެ މައްސަލައެއް ފެންމަތިވި އިރު އެހެން ޒުވާނަކު އަމިއްލައަށް "ޓިކްޓޮކް" ގައި ބަރަހަނާވި މައްސަލައަކާ ގުޅިގެން ވަނީ ހައްޔަރު ކޮށްފަ އެވެ.