ރާއްޖޭގެ ދައުލަތް ހިންގުމުގެ ނިޒާމުގެ ތެރެއިން އިސްރަށްވެރިހިންނަށް ބައެއް ކަންކަން ތައާރަފްކުރުމަކީ ކުރަން ޖެހިފައިވާ ކަމެއް ކަމަށް އިސްރަށްވެހިންގެ ޖަމިއްޔާގެ ރައީސް އަބްދުލްއަޒީޒު ޔޫސުފް (އަޒީ) ވިދާޅުވެއްޖެ އެވެ.
އަވަސްގެ ފޭސް ޓު ފޭސް ޕްރޮގްރާމްގައި ވާހަކަދައްކަވަމުން ކުރީގެ ސަފީރުކަން ކުރެއްވި އަޒީ ވިދާޅުވީ 2019 ވަނަ އަހަރު އެ ޖަމިއްޔާގެ ފަރާތުން ރައީސް އިބްރާހިމް މުހައްމަދު ސޯލިހާއި ބައްދަލުކުރެއްވި ކަމަށެވެ. އެ ބައްދަލުވުމުގައި އިސްރަށްވެހިންނަށް ހާއްސަ ގާނޫނެއް އެކުލަވައިލުކީ މުހިންމު ކަމެއް ކަމުގައި ރައީސްއަށް ދެންނެވި ކަމަށް އަޒީ ވިދާޅުވި އެވެ.
ދައުލަތުގެ ނިޒާމުގެ ތެރޭގައި އަންހެނުންނާ ކުޑަކުދިންގެ ހައްގުތަކާއި، ކުޅިވަރާ ތައުލީމުގެ ހައްގުތަކާ ބެހޭ ކަންކަން ހަމަޖައްސާފައިވާ ފަދައިން އިސްރަށްވެހިންގެ ހައްގުތަކާ ގުޅޭ ކަންކަން ވެސް ހަމަޖެހިފައި އޮންނަން ޖެހޭނެ ކަމަށް އަޒީ ވިދާޅުވި އެވެ.
އެ ބައްދަލުވުމުގައި އެކަމާގުޅޭ ގާނޫނީ އޮނިގަނޑެއް ހައްދަވާނެ ކަމަށް ރައީސްއާއި ހަވާލާދެއްވައި އަޒީ ވިދާޅުވި އެވެ. އެ މަސައްކަތް ޕްރައިވެޓް ލޯޔަރުންނާ ހަވާލުކޮށްގެން ކުރާއިރު މިހާރު ފުރަތަމަ ޑްރާފްޓްގެ މަސައްކަތް ނިމިފައިވާ ކަމުގެ މައުލޫމާތު ލިބިފައިވާ ކަމަށް އަޒީ ވިދާޅުވި އެވެ.
އަޒީ ވިދާޅުވީ ދައުލަތަށް އެތައް އަހަރަކު ހިދުމަތްކޮށްދިނުމަށްފަހު 65 އަހަރުވުމުން ރިޓަޔާ ކުރުމަކީ އެމީހުންނަށް ވެސް އަދި ދައުލަތުގެ ނިޒާމަށް ވެސް ލިބޭ އުނިކަމެއް ކަމަށެވެ. ސަބަބަކީ އެފަދަ މީހުންނަނީ ފަންނީ އަދި ތަޖުރިބާ ހުރި މީހުންކަމަށްވާއިރު، ދައުލަތް ހިންގުމުގައި ވެސް އެމީހުންނަށް އެހެން ގޮތްގޮތުން އެހީވެދެވޭނެ ކަމަށެވެ.
ދުނިޔޭގެ ފެންވަރު ރަގަޅު ޔުނިވާސިޓީތަކުން ކިޔަވައިގެން ތިބި މީހުން މިހާރު ރިޓަޔާވެފައި ތިބި ކަމަށާއި އެމީހުންގެ ބޭނުން ހިފޭނެ ގޮތްތަކެއް ކަނޑައަޅަން ޖެހޭ ކަމަށް އަޒީ ވިދާޅުވި އެވެ.
"އަޅުގަނޑުމެން ނެގި އެއް މައްސަލަ އެއީ. މިހާ ގިނަ މީހުން އެބަ ތިއްބޭ ރިޓަޔާކޮށްފަ މިހާރު. އެ މީސްމީހުންނަށް ޕްރައިވެޓް ސެކްޓާގަ އެހާ ގިނަ ވަޒީފާތަކެއް ނުހުރޭ. ކޮންމެސް ގޮތެއް އެބަ ހަމަޖައްސަން ޖެހޭ މިސާލަކަށް ކައުންސިލިން ދިނުން ކަމުގައިވިޔަސް އެޑްވައިޒަރުންގެ މަގާމު ކަމުގައި ވިޔަސް، ކޮންސަލްޓެންޓުންގެ މަގާމު ކަމުގައި ވިޔަސް އެކަހަލަ މަގާމުތަކެއްގަ އެމީހުން އެބަ ބޭނުންކުރަން ޖެހޭ. ނޫނީ އެކިއެކި ޖަމިއްޔާތަކާ ތިންކް ޓޭންކްތައް އުފައްދައިގެން އެމީހުން ކޮންޓްރިބިއުޓް ކުރާގޮތަށް އެމީހުންގެ ތަޖުރިބާއާ އިލްމީ ގޮތުން ހާސިލްކޮށްފައިހުރި ކަންކަން ބޭނުންކޮށްގެން ރާއްޖޭގެ އެކިއެކި މައްސަލަތަކާ ގުޅޭ ރިޕޯޓުތައް ހަދާދިނުން ފަދަ ކަންކަމުގަ އެމީހުންގެ ބޭނުން ހިފޭނެ،" އަޒީ ވިދާޅުވި އެވެ.
ދައުލަތުގެ ހިންގުމުގެ ނިޒާމްގެ އޮނިގަނޑުގައި އިޖުތިމާއީ ހަރަކާތްތަކަށް ނިކުމެ އުޅޭ މީހުންނަށް އެކަށީގެންވާ ފުރުސަތުތައް ނުދިނުން އުނިވާ ކަމަށް ވެސް އަޒީ ފާހަގަކުރެއްވި އެވެ.
މީގެ އިތުރުން އަޒީ ވިދާޅުވީ މިފަދަ މަސައްކަތްތައް ކުރާ ސިވިލް ސޮސައިޓީ އޯގަނައިޒޭޝަންތަކަށް ވެސް ދައުލަތުން އެހީތެރިވުމަކީ މުހިންމު ކަމެއް ކަމަށެވެ. އެގޮތުން ދައުލަތަށް މިފަދަ ޖަމިއްޔާތައް ހިންގޭނެ ގޮތްތައް މަގުފަހިކޮށްދެވޭނެ ކަމަށް ވިދާޅުވި އެވެ.
އަޒީ ވިދާޅުވީ މިފަދަ ޒަމިއްުޔާތައް ހިންގުމަށް ވަކި އިމާރާތެއް އަޅައިދެވިދާނެ ކަމަށެވެ. އެ އިމާރާތް ޖަމިއްޔާތަކަށް ކުއްޔަށް ދީގެން ހިންގޭނެ ކަމަށާއި އެއީ ޖަމިއްޔާތަކުގެ ހިންގުމަށް ވެސް ލިބޭނެ ވަރަށް ބޮޑު ލުޔެއް ކަމަށެވެ.
މީގެ އިތުރުން އިސްރަށްވެހިންނަށް ހާއްސަކޮށްގެން ތިންކް ޓޭންކްތަކެއް ވެސް ދައުލަތަށް ހަދައިދެވި ދާނެ ކަމަށް ވިދާޅުވި އެވެ. އެ ތިންކް ޓޭންކްތައް މެދުވެރިކޮށް އެމީހުންނަށް ގައުމުގައި ހުރި އެކި މައްސަލަތަކާ ގުޅޭ ރިޕޯޓްފަދަ އެއްޗެހި ހެދިދާނެ ކަމަށް އަޒީ ވިދާޅުވި އެވެ.
މީގެ ކުރީ ސަރުކާރުތަކުގައި ވެސް މި ޖަމިއްޔާއިން ވަނީ ރައީސުންނާއި ނައިބު ރައީސުންނާ ބައްދަލުކޮޮށް އެމީހުން ބޭނުންވާ ކަންތައްތައް ހުށަހަޅާފަ އެވެ. ނަމަވެސް އެއްވެސް ކުރިއެރުމެއް ނުލިބޭ ކަމަށް އަޒީ ވަނީ ފާހަގަކުރައްވާފަ އެވެ.