އެންޓި ކޮރަޕްޝަން ކޮމިޝަން (އޭސީސީ)ގައި ހުސްވެފައިވާ މެންބަރު ކަމަށް ދެވަނަ ފަހަރަށް ހުޅުވާލައިފި އެވެ.
އޭސީސީގެ މެންބަރު ކަމަށް އެންމެ ފުރަތަމަ ހުޅުވާލީ މިމަހުގެ އަށްވަނަ ދުވަހު އެވެ. ނަމަވެސް އެ އިއުލާންގެ މުއްދަތު އިއްޔެގެ ނިޔަލަށް ހަމަވެފައި ވަނިކޮށް މިއަދު އަލުން ވަނީ އޭސީސީގެ މެންބަރު ކަމަށް ހުޅުވާލާފަ އެވެ.
އޭސީސީގެ މެންބަރު ކަމަށް ކުރިމަތިލުމަށް މިހާރު ފުރުސަތު ހުޅުވާލާފައިވަނީ މި މަހުގެ ނިޔަލަށެވެ.
އޭސީސީގެ ދެ މެންބަރެއްގެ މަގާމު މިދިޔަ ނޮވެމްބަރު 25 ވަނަ ދުވަހު ހުސްވީ އެ ކޮމިޝަންގެ ނައިބު ރައީސްގެ ގޮތުގައި އަބްދުލް ސަލާމް އާއި މެންބަރެއްގެ ގޮތުގައި ތޯހާ މުހައްމަދަށް ރައްޔިތުންގެ މަޖިލީހުން ބޮޑެތި ތުހުމަތުތަކެއްކޮށް އެ ދެ ބޭފުޅުން މަގާމުން ވަކިކުރުމަށް މަޖިލީހުގެ މިނިވަން މުއައްސަސާތަކުގެ ކޮމިޓީން ނިންމާ، މަޖިލީހުގެ ތަޅުމުން ވޯޓަށް އެހުމަށް ތައްޔާރުވަމުން ދަނިކޮށް މަގާމުން އިސްތިއުފާ ދެއްވުމާ ގުޅިގެންނެވެ.
އޭސީސީގައި މެންބަރުންގެ ގޮތުގައި މިވަގުތު ތިއްބެވީ އެ ކޮމިޝަންގެ ރައީސް އާދަމް ޝާމިލާއި މެންބަރުން ކަމަށްވާ ޝިޔާމާ މުހައްމަދުގެ އިތުރުން ޝަޒްނާ ހާޝިމެވެ.
އޭސީސީއާއި އީސީގެ ރައީސް އާއި ނައިބް ރައީސް އަކީ ރައީސުލްޖުމްހޫރިއްޔާ އައްޔަންކުރައްވާ މަގާމުތަކެއްގެ ގޮތުގައި ހެދުމަށް އެ މުއައްސަސާގެ ގާނޫނުވެސް މިހާރު ވަނީ އިސްލާހުކޮށްފަ އެވެ. ނަމަވެސް މި އިސްލާހާ އެއްގޮތަށް އަދި އޭސީސީއާއި އީސީގެ ރައީސް އަދި އައްޔަންކޮށްފައެއް ނުވެ އެވެ.